Засгийн газрын ээлжит хуралдаанаар Оюу толгой төслийн Хөрөнгө оруулалтын гэрээ болон менежментийн төлбөртэй холбоотой асуудлыг хэлэлцжээ. Товчхондоо, хоёр талын хэлэлцээр бичиг хэрэг солилцох, биечилж уулзах, цахимаар ярилцах зэргээр идэвхтэй үргэлжилж байна гэж Аж үйлдвэр, эрдэс баялгийн сайд Г.Дамдинням мэдээллээ.
Тэрээр "Монгол Улсын Ерөнхий сайдын захирамжаар байгуулсан хоёр ажлын хэсэг ажиллаж байна. Оюу толгой төслийн Хөрөнгө оруулалтын гэрээний зээлийн хүүтэй холбоотой асуудлыг Сангийн сайд хариуцаж байна. Миний хувьд менежментийн төлбөртэй холбоотой зардлыг бууруулах, засаглалыг сайжруулах чиглэлд арга хэмжээ авах хэлэлцээрийг ахалж байна. Хэлэлцээр тасалдсан зүйл байхгүй, хэвийн үргэлжилж байна. Харилцагч талд саналуудаа удаа дараа тавьж, бичгээр байнга харилцаж байна. Маш эрчимтэйгээр бодит үр дүнтэй явж байгаа.
Нэгд, зээлийн хүүгийн хэлэлцээрийг хэлэлцэхэд саад болж байсан долоон жилийн түгжээг авч хаялаа.
Хоёрт, хэлэлцээрийг заавал үр дүнд хүртэл нь үргэлжлүүлнэ гэсэн тохиролцоонд хүрсэн.
Гуравт, зээлийн хүү болон менежментийг төлбөрийг олон улсын жишигт нийцсэн хэмжээгээр хүргэнэ гэсэн шийдэл явагдаж байна.
Энэ сарын 12-нд Рио Тинтогийн хэлэлцээрийн баг Монголд ирнэ. Энэ үеэр хоёр ажлын хэсэг хэлэлцээрийг үргэлжлүүлж хийнэ. Засгийн газраас хэлэлцээрийн багийн бүтцийг Хэрэг эрхлэх газрын даргаар нэгтгэн зангидах зарчмын шийдлийг хийж ажиллана.  Гурван ажлын дэд хэсэг болон ерөнхий том ажлын хэсэг ойрын өдрүүдэд хуралдана. Ингэхдээ одоо хэрэгжиж буй ажлуудаа ярилцаж 12-нд эхлэх хэлэлцээрээр үр дүн гаргахын төлөө ажиллана. Хэлэлцээр учраас хоёр талын байр суурь яригдана. Миний ахалж буй хэлэлцээр нь нууцтай холбоотой мэдээлэл юм. Монгол Улсын Засгийн газар ард иргэдийнхээ эрх ашгийг хамгаалах хүрээнд тодорхой стратеги, тактикаа гаргаж ажиллаж байна. Энэ асуудлыг нууцын горимтойгоор хэлэлцэж явж байна.
Онтрегийн лицензтэй холбоотой асуудал дээр ажлын хэсэг байгуулсан, хэлэлцээр хийгдэнэ. Энд өөрсдийн эрх ашгийг хангуулах, шинэ хөрөнгө оруулалтын гэрээ байгуулна. Ингэхдээ хувь хэмжээ гэхээс илүү ашигт малтмалын нөөц ашигласны төлбөрөөр асуудлыг ярина гэсэн зарчмын байр суурьтай байна. Эхний ээлжид үндсэн асуудлуудаа шийдэж байж дараагийн зүйлс рүү орно" гэлээ.

Рэгзэдмаа ЭРДЭНЭЧИМЭГ

Р.Эрдэнэчимэг нь 2022 онд Их засаг их сургуулийг сэтгүүлч мэргэжлээр төгссөн бөгөөд 2026 оноос iToim.mn сайтад ажиллаж байна.

Нийтэлсэн огноо2026-05-06