Оны эхний зургаан сарын байдлаар Монгол Улс 34 мянга гаруй суудлын автомашин импортолсныг Гаалийн ерөнхий газар мэдээллээ. Энэ нь өнгөрсөн оны мөн үед 26 мянга нэгж суудлын автомашин импортолсонтой харьцуулахад 27 хувиар өссөн үзүүлэлт болж байна.
Сүүлийн жилүүдэд автомашины импортод хосолмол хөдөлгүүртэй суудлын автомашин гол жин дарж байгаа бөгөөд тайлант хугацаанд 24 мянга давсан үзүүлэлттэй байна.
Үүний зэрэгцээ бүрэн цахилгаан хөдөлгүүртэй суудлын 103 автомашин импортолжээ. Өнгөрсөн оны мөн үед 23-ыг импортолж байсантай харьцуулахад 347 хувиар өссөн үзүүлэлт болж байна.
Дэлхийн өндөр хөгжилтэй улс орнуудад цахилгаан автомашины хэрэглээ эрчимтэй тэлж байгаа бөгөөд үүнийг дагаад тогтвортой байдлын хүрээнд уламжлалт хөдөлгүүртэй автомашиныг шат дараатайгаар хэрэглээнээс халах хандлага нэмэгдэж байна.
Харин Монгол Улсын хувьд "Цахилгаан хөдөлгүүртэй автомашины хэрэглээг нэмэгдүүлэхэд цэнэглэх станцуудын тоог нэмэгдүүлж, дэд бүтцэд анхаарах хэрэгтэй" гэж “BYD” брэндийн төлөөлөгч Б.Баярманлай онцолж байсан юм.

 

Нийтэлсэн огноо2022-08-04