НҮБ-ын Ерөнхий нарийн бичгийн дарга Антонио Гутерреш "Монгол Улс эрчим хүчний нийлүүлэлтийн сүлжээнд зэсийн нөөцөөрөө томоохон тоглогч болох боломжтой" гэж мэдэгдлээ.
Мөн тэрбээр Монгол Улсад нийгэм, эдийн засаг болон тогтвортой хөгжлийн зорилтуудыг хэрэгжүүлэхэд үргэлжлүүлэн дэмжлэг үзүүлэхээ илэрхийлэв. Эрчим хүчний шилжилтийн нөлөөгөөр 2035 он гэхэд дэлхийн зах зээлд зэсийн эрэлт хоёр дахин өсөж, 50 сая тонн хүрнэ гэж “S&P Global” тооцоолж байгаа юм.

“Оюутолгой” төслийн гүний уурхайн бүтээн байгуулалтын хувьд “Панел 0”-ийн анхны тогтвортой үйлдвэрлэл 2023 оны эхний хагаст эхлэх хүлээлттэй байна. Ингэснээр зэсийн гарц нэмэгдэхээс гадна уул уурхайн салбарын хөрөнгө оруулалт өсөж, эдийн засагт ихээхэн хувь нэмэр оруулахаар байгаа юм.

Мөн Монгол Улс цаашид сэргээгдэх эрчим хүчийг гол эрчим хүчний хангамж болгох зорилтод хүрэхэд НҮБ-ын туслалцаа, дэмжлэг чухал үүрэг гүйцэтгэхийг Гадаад харилцааны сайд Б.Батцэцэг онцоллоо.

НҮБ-ын Ерөнхий нарийн бичгийн дарга Антонио Гутерреш
“Монгол Улс өөрийгөө төдийгүй бусад улсыг хангахуйц сэргээгдэх эрчим хүчний их нөөцтэй тул сэргээгдэх эрчим хүчний салбарт тэргүүлэгч болох боломжтой. Монгол Улс эрчим хүчний аюулгүй байдлыг хангахын зэрэгцээ эдийн засгийн боломжуудыг бий болгож чадна гэж би үзэж байна. Мөн Монгол Улс сэргээгдэх эрчим хүчний хангамжийн сүлжээнд зэсийн нөөцөөрөө томоохон тоглогч болох боломжтой юм” гэж мэдэгдлээ.
Гадаад харилцааны сайд Б.Батцэцэг
“Монгол Улсын Засгийн газар НҮБ-тай энэ оны тавдугаар сард байгуулсан 2023-2027 онд хэрэгжүүлэх “Тогтвортой хөгжлийн хамтын ажиллагааны хүрээ”-нд үндэсний хөгжлийн зорилтуудад уялдуулан хүний хөгжил, ногоон хүртээмжтэй, тогтвортой өсөлт, хүн төвтэй засаглал, эрх зүйт ёс, хүний эрх гэсэн тэргүүлэх таван чиглэлээр НҮБ-тай нягт хамтран ажиллана. Нэн ялангуяа, манай улсын боловсролыг шинэчлэх, “Цахим үндэстэн” болох, сэргээгдэх эрчим хүчийг гол эрчим хүчний хангамж болгох зорилтуудыг хэрэгжүүлэхэд НҮБ-ын туслалцаа, дэмжлэг чухал үүрэг гүйцэтгэнэ гэж үзэж байна” гэж мэдэгдэв.

Нийтэлсэн огноо2022-08-10