Монгол Улс 2022 оны эхний долоон сарын хугацаанд 4.7 тэрбум ам.долларын бараа, бүтээгдэхүүн импортолсон байна. Энэ нь сүүлийн гурван жилийн хугацааны хамгийн өндөр дүн боллоо.
Үнийн дүн өндөртэй нефтийн бүтээгдэхүүн, автомашины импорт нэмэгдсэн нь нийт импорт өсөхөд гол нөлөө үзүүлсэн болохыг Гаалийн ерөнхий газрын статистик мэдээллээс харж болохоор байна.
Импортын бүтцийн хувьд 19.5 хувийг нефтийн бүтээгдэхүүн, 11.2 хувийг суудлын болон ачааны автомашины импорт бүрдүүлжээ. Мөн оны эхний долоон сарын хугацаанд 102.5 сая ам.долларын цахилгаан, эрчим хүчийг хоёр хөршөөс импортолсон байна.
2022 оны эхний долоон сарын хугацаанд Монгол Улс 384.4 мянган тонн авто бензин худалдан авсан нь сүүлийн гурван жилийн дээд түвшинд хүрсэн үзүүлэлт болж байна. Иргэдийн хамгийн өргөнөөр хэрэглэдэг АИ-92 авто бензины гаалийн албан татварыг 2022 он дуустал тэглээд байгаа юм.
Цар тахлын үеийн нөхцөл байдалтай харьцуулахад эдийн засгийн голлох салбарууд идэвхэжсэн ч БНХАУ-ын хилийн боомтууд бүрэн нээгдээгүй байгаа нь бараа татан авалт хийхэд хүндрэл учруулсан хэвээр байгааг бизнес эрхлэгчид онцолж байна. Хэдий тийм боловч БНХАУ-ын хилийн боомтууд дахь чингэлгүүдийн бөөгнөрөл харьцангуй багасаж, Япон, БНСУ-аас импортолдог суудлын автомашин тээвэрлэх хугацаа 1.5-2.5 сар болж богиносоод байгаа юм.
Хүнсний гол нэрийн бараа, бүтээгдэхүүнээс өтгөрүүлсэн болон хуурай сүү, өндөг, жимс самар, тахиа, гахайны мах, өөх зэрэг бүтээгдэхүүний татан авалт нэмэгдэж, өмнөх хоёр жилийн түвшнээс өссөнийг Гаалийн ерөнхий газар мэдээллээ.

Нийтэлсэн огноо2022-08-11