VIII сард нийт зээлийн үлдэгдэл өмнөх сараас 2.4 хувиар буурсан бол өмнөх оны мөн үеэс 14.6 хувиар өсжээ
Мөнгөний нийлүүлэлт наймдугаар сард өмнөх сараас болон өмнөх оны мөн үеэс үл ялиг буурч, 26.9 их наяд төгрөг боллоо. Мөнгөний нийлүүлэлт өмнөх оны мөн үеэс 1.8 хувиар буурахад иргэдийн төгрөгийн хадгаламж болон хадгаламжийн байгууллагаас гадуурх мөнгөний хэмжээ буурсан нь голлон нөлөөлсөн гэж Үндэсний статистикийн хороо мэдээлэв. Сүүлийн хоёр сарын хугацаанд мөнгөний нийлүүлэлтэд эзлэх гадаад цэвэр активын орон зай буурсан хэвээр байна.
Монголбанкнаас баримталж буй мөнгөний хатуу бодлоготой зэрэгцээд банкнуудын зээл олголт хумигдаж, зээлийн шалгуурыг чангалснаар дөрөвдүгээр сараас хойш нийт зээлийн үлдэгдэл тасралтгүй буурах хандлагатай байна. Тухайлбал: худалдаанаас бусад салбарт зээл олголт буурчээ.
Наймдугаар сарын эцсийн статистик үзүүлэлтээр нийт зээлийн үлдэгдэл өмнөх сараас 2.4 хувиар буурсан бол өмнөх оны мөн үеэс 14.6 хувиар өсжээ. Нийт зээлийн үлдэгдлийн 48 хувь нь аж ахуйн нэгжүүдэд олгосон зээл байгаа бол 52 хувь нь иргэдийн зээлийн үлдэгдэл байна. Зээлийн чанаржилтын хувьд хэвийн болон хугацаа хэтэрсэн зээлийн үлдэгдэл өмнөх сараас буурчээ.
Харин чанаргүй зээлийн үлдэгдэл өмнөх сараас 18.5 хувиар өсөж, 2.51 их наяд төгрөг болж, нийт үлдэгдлийн 11 хувийг бүрдүүлэх болсон байна. Хувийн салбарын чанаргүй зээлийн үлдэгдэл иргэдийн чанаргүй зээлийн үлдэгдлийн өсөлтөөс давсан байна. Тээвэр логистикийн хэвийн бус үйл ажиллагаанаас үүдэлтэй уул уурхай, барилгын салбарын өсөлт удаашралтай байгааг Монголын банкны холбоо мэдээлж байв.

Нийтэлсэн огноо2022-09-20