Үнийн өсөлтийн нөлөөгөөр бизнесүүдийн ашиг 52 хувиар буурчээ
Үнийн өсөлт эрчимжсэнээр бизнесийн ашиг дунджаар 52 хувиар буурсныг МҮХАҮТ-ын бизнесийн орчны судалгаа харуулж байна.
Судалгаанд хамрагдсан бизнес эрхлэгчдийн 43 хувьд нь сүүлийн хагас жилийн хугацаанд, 57 хувьд нь хагас жилээс дээш хугацаанд үнийн өсөлтийн дарамт ирсэн гэж хариулжээ.
Инфляц тавдугаар сард 15.1 хувь болж, 2012 оноос хойш дээд түвшинд хүрсэн бөгөөд сүүлийн хоёр сард хэрэглээний үнийн индекс сарын дүнгээр буурсан ч өндөр түвшинд хадгалагдсан хэвээр байна.
Үнийн өсөлт бизнесийн үйлд ажиллагаанд түүхий эд бараа материалын үнэ өсөж, үйл ажиллагаа, ажиллах хүчний зардал өсөж, борлуулалт буурсан зэргээр нөлөөлж байгааг энэхүү судалгаа харуулж буй.
Бизнес эрхлэгчдийн 69 хувь нь үнийн өсөлтийн дарамтыг бууруулахын тулд бага хүүтэй, урт хугацаатай зээл шаардлагатай гэж үзэж байгаа аж.

Монголбанкны хувьд инфляцтай тэмцэхээр бодлогын хүүг энэ онд дөрөв дараалан өсгөөд байна. Тухайлбал: мягмар гарагт бодлогын хүүг 12 хувьд буюу 2017 оноос хойших дээд түвшинд хүргэсэн билээ.

Дэлхийн банкны Ерөнхийлөгч Дэвид Малпасс "Эдийн засаг дахь үйлдвэрлэлийн гарцыг нэмэгдүүлэхэд анхаарвал бодлогын хүүг олон удаа өсгөх шаардлагагүй" болохыг онцолж байгаа юм.

Нийтэлсэн огноо2022-09-21