Монголбанк валютын нөөцийг тодорхой түвшинд хангахад анхаарч байна.Гадаад валютын албан нөөц 11 дүгээр сарын байдлаар 2.9 тэрбум ам.доллар болж, өмнөх сараас 5.3 хувиар өссөн байна. Гадаад валютын нөөц хэдийгээр өмнөх сараасаа өссөн ч өмнөх оны мөн үеэс 29.5 хувиар буурчээ.
Энэ онд гадаад валютын албан нөөцийн хэмжээ эрчимтэй буурч, VIII сард 2.7 тэрбум ам.доллар буюу доод түвшинд хүрээд байсан бол IX, X саруудад эргэн бага зэрэг өсжээ.
Монгол Улс "Чингис" бондын 1.5 тэрбум ам.долларын өрийг бүрэн төлж барагдуулсныг Ерөнхий сайд мэдээлэв. "Чингис" бондын зарцуулалтын 63 хувийг улсын төсөвт авч хэрэглэсэн буюу үлдэгдэл 136 сая ам.долларыг 2022 оны төсөв дээр тусгасны дагуу Төрийн сангаас төлж барагдуулсан болохыг Сангийн сайд Б.Жавхлан тайлбарласан юм. Мөн ирэх онд "Самурай" бондын төлбөрт өгөх ёстой 30 тэрбум иенийг Хөгжлийн банкны зээлүүдийг төлүүлсэн эх үүсвэрээс цуглуулаад байгааг тэрбээр мэдээллээ.
Энэ онд гадаад бондын төлөлт харьцангуй бага байсан аж. Харин ирэх онуудад бондын эргэн төлөлтүүд нэмэгдэж, зарим бондын хугацаа дуусах дөхөж байгаа нь валютын хэмжээг нэмэгдүүлэх зайлшгүй шаардлага үүсэж байна.

Монголбанк валютын нөөцийг тодорхой түвшинд хангахад анхаарч байгааг мэдээллээ. Энэ хүрээнд хувь хүн, аж ахуйн нэгжүүдийн алт тушаалтыг нэмэгдүүлэх арга зам авч байна. Тухайлбал: “Алт-2” хөтөлбөрийн санхүүжилтийг үргэлжлүүлэх, олон улсын зах зээлээс таван хувиар өндөр үнээр худалдан авч байгаа аж.

Нийтэлсэн огноо2022-12-07