Гадаад худалдааны бараа эргэлт өсөхөд экспорт хоёр дахин өссөн нь голлон нөлөөлжээ.Гадаад худалдааны нийт бараа эргэлт 2023 оны нэгдүгээр сард 1.75 тэрбум ам.доллар болж, өмнөх оны мөн үеэс 61 хувиар өссөнийг Гаалийн ерөнхий газар мэдээллээ.
Нийт бараа эргэлт өсөхөд экспорт хоёр дахин өссөн нь голлон нөлөөлсөн бол импорт 23.6 хувиар өссөн байна. Ингэснээр нийт гадаад худалдааны тэнцэл 389.7 сая ам.долларын ашигтай гарчээ. Гадаад худалдааны ашиг сүүлийн гурван жилийн дээд түвшиндээ хүрсэн байна.
Нийт экспортын орлогын 565.3 сая ам.доллар буюу 52.5 хувийг нүүрс, 17 хувийг зэс, 11 хувийг алтны экспортын орлого бүрдүүлж байна. Эдгээр бүтээгдэхүүний үнийн дүн болон тоо хэмжээ аль аль нь өсөлттэй гарсныг Гаалийн ерөнхий газар мэдээллээ.
Харин нэгдүгээр сард 160 орчим сая ам.долларын нефтийн бүтээгдэхүүн импортоор авсан нь сүүлийн гурван жилийн хамгийн бага дүн болсон ч суудлын автомашины импорт 60 орчим сая ам.доллар болж, 0.4 хувиар нэмэгджээ. Мөн импортоор ачааны 1203 автомашин худалдан авсан нь сүүлийн гурван жилийн доод хэмжээнд хүрсэн бол дизель түлшний импорт биет хэмжээгээр 38.2 хувиар өсөөд байна.
Засгийн газар 2024 он хүртэл АИ-92 автобензин болон цементийн импортын гаалийн албан татварыг тэглэх шийдвэр гаргасан бөгөөд энэ нь ирэх хоёрдугаар сараас хэрэгжиж эхэлнэ.
Харин уул уурхайгаас бусад экспортын бүтээгдэхүүнээс малын мах, дайвар бүтээгдэхүүн 3.79 мянган тонн болж өссөн бол ямааны угаасан ноолуур 0.05 мянган тонн болж, 92.7 хувиар буурчээ.
Засгийн газар зөвхөн самнасан ноолуур экспортлох тогтоол гаргасан бөгөөд ингэснээр дотоодод боловсруулах үйлдвэрүүд хөгжиж, нэмүү өртөг нь үлдэх боломжтой гэж үзэж байгаа аж.
Үүнтэй холбоотойгоор компаниуд бэлтгэл ажлаа хангаж, үйлдвэрлэлийн хүчин чадлаа өргөжүүлэх хөрөнгө оруулалт хийхээр зорьж буйгаа “Bloomberg TV Mongolia”-д ярилцлага өгөх үедээ онцолж байсан юм.

Нийтэлсэн огноо2023-02-08