Ургацын урьдчилсан балансаар улаанбуудай, төмсний хэрэгцээг 100 хувь, хүнсний ногооны 81.3 хувийг дотоодын ургацаас хангах боломж бүрджээ.Энэ сарын нэгний байдлаар улсын хэмжээнд 107.7 мянган тонн хадлан бэлтгэж, 19.5 мянган тонн хүнсний ногоо, 8000 тонн төмс хурааж, 2.5 мянган тонн гар тэжээл бэлтгэснийг Үндэсний Статистикийн хороо мэдээллээ.

Өмнөх оны мөн үетэй харьцуулахад бэлтгэсэн хадлан 17.2 хувиар, хүнсний ногоо 14.4 хувиар өсжээ. Харин төмс 39.1 хувиар, гар тэжээл 55.8 хувиар тус тус буурсан үзүүлэлттэй байна.

Хүнсний ногооны үйлдвэрлэл энэ жил 18.3 хувиар нэмэгдэх төлөвтэй байгааг Засгийн газар онцолж байна. Мөн энэ жил улсын хэмжээнд нэгжийн ургац сүүлийн 10 жилийн хамгийн өндөр хэмжээнд хүрч, урьдчилсан балансаар 480 мянган тонн улаан буудай хураан авч, өмнөх оноос 20 орчим хувиар өсөхөөр байгаа аж.

Энэ онд улсын хэмжээнд 369.3 мянган га-д үр тариа, үүнээс 345.4 мянган га-д улаанбуудай, 18.4 мянган га-д төмс, 13.9 мянган га-д хүнсний ногоо, 89.3 мянган га-д малын тэжээл, 131.7 мянган га-д тосны ургамал, 7000 га-д жимс, жимсгэнэ, нийт 629.6 мянган га-д тариалалт хийсэн байна.

Ургацын урьдчилсан балансаар 501 мянган тонн үр тариа, үүнээс 472.2 мянган тонн улаанбуудай, 165 мянган тонн төмс, 165.7 мянган тонн хүнсний ногоо, 64.8 мянган тонн тосны ургамал, 225.6 мянган тонн малын тэжээлийн ургамал, 5000 тонн жимс жимсгэнэ хураан авах боломжтой гэсэн төлөв гараад байгаа юм. Улаанбуудай, төмсний хэрэгцээг 100 хувь, хүнсний ногооны 81.3 хувийг дотоодын ургацаас хангах боломж бүрдээд байгаа бөгөөд улаанбуудайн үйлдвэрлэл өнгөрсөн оныхоос 70 мянган тонноор, хүнсний ногооны үйлдвэрлэл 25.7 мянган тонноор, малын тэжээл 67.2 мянган тонноор өсөхөөр байгаа ажээ.

Нийтэлсэн огноо2023-09-20