“ХААН банк” ХК 271 тэрбум төгрөгийн ногдол ашигт хуваарилсан нь хамгийн өндөрт тооцогдож байна

Монголын Хөрөнгийн биржид бүртгэлтэй 47 хувьцаат компани 2024 онд нэг их наяд орчим төгрөгийн ногдол ашиг хуваарилахаар шийдвэрлэснийг биржийн мэдээллээс харж болохоор байна. Энэ нь 2023 онтой харьцуулахад 27 хувиар өссөн дүн боллоо.

Зургаан банкны хуваарилсан ногдол ашиг нийт 543 тэрбум гаруй төгрөг буюу 50 гаруй хувийг бүрдүүлж байгаа аж.

“ХААН банк” ХК 271 тэрбум төгрөгийн ногдол ашигт хуваарилсан нь хамгийн өндөрт тооцогдож байгаа бол “Тавантолгой” ХК 263 тэрбум төгрөг хуваарилсан байна. Нэгж хувьцаанд ногдох ашгийн хэмжээгээр “Жуулчин дюти фрий” ХК 30 мянга 600 төгрөг хуваарилсан нь хамгийн өндөр дүн болжээ.

Үүнээс гадна “Эрдэнэс Тавантолгой” ХК 2024 онд 4.3 их наяд төгрөгийн ашигтай ажиллаж, хувьцаа эзэмшдэг иргэн бүрд 337 мянган төгрөгийн ногдол ашгийг 2024-2025 онд гурав хуваан олгохоор шийдвэрлэсэн юм.

Дашрамд дурдахад, Төрөөс татварын бодлогоор хөрөнгө оруулалтыг дэмжих арга хэмжээний хүрээнд хувьцаа, үнэт цаас борлуулсны орлогод ногдох орлогын албан татварыг 2027 он хүртэл 90 хувь, 2029 он хүртэл 50 хувиар хөнгөлсөн. Мөн нээлттэй компанийн хувьцааны ногдол ашгийн татварыг дотоодод 10 хувь, гадаадад 20 хувь байсныг нийтлэг таван хувь болгож бууруулаад байна.