АНУ-ын ерөнхийлөгч Дональд Трампын засаг захиргаа өөрийн Элчин сайдын яамдад гадаад оюутны визийн ярилцлагыг түр зогсоох чиглэл өгсөн тухай Ройтерс агентлаг мэдээллээ.  
Энэ нь цагаачлалын хатуу бодлогын хүрээнд хууль бус оршин суугчдыг албадан гаргах, оюутны визийг цуцлах алхмуудын нэг хэсэг юм. Мөн оюутнуудын цахим сүлжээний мэдээллийг шалгаж байж виз олгох эсэхийг тодорхойлдог болохтой холбоотой аж.
Тодруулбал Төрийн нарийн бичгийн дарга Марко Рубио “Их сургуулийн болон солилцооны оюутнуудын олон нийтийн сүлжээний хэрэглээг шалгах шинэ удирдамжийг шалгалт хийж дууссаны дараа гаргана. Тиймээс консулын газрууд шинэ ярилцлагын цаг товлохоо түр зогсоох шаардлагатай” гэжээ.
Эх сурвалжуудын мэдээллээр товлогдсон ярилцлагуудыг хэвийн явуулна. Харин шинэ ярилцлагын цаг товлохгүй байх үүрэг өгсөн байна.
Ройтерс агентлагийн олж авсан мэдээлэлд “Төрийн департамент нь F, M, J ангиллын оюутны болон солилцооны виз мэдүүлэгчдийн материалыг шалгаж байгаа.
Үүний дараа өргөдөл гаргагчдын олон нийтийн сүлжээний хэрэглээг өргөн хүрээнд шалгах удирдамж гаргана” гэж дурджээ.
АНУ-ын Төрийн департаментын хэвлэлийн төлөөлөгч дээрх баримт үнэн эсэх мэдээлэл өгөхөөс татгалзсан байна.
Эх сурвалж: Reuters, ВВС

Нийтэлсэн огноо2025-05-28