Батлан хамгаалах, харилцаа холбоо, сэргээгдэх эрчим хүчний салбаруудад амин чухал түүхий эд болдог газрын ховор элементийн олборлолтоор Хятад улс дэлхийд бараг дангаараа ноёрхдог.

Тэгвэл ОХУ энэ салбарт $1.5 тэрбумын хөрөнгө оруулалт хийж, Хятад улстай өрсөлдөх төлөвлөгөөтэй байгааг тус улсын засгийн газрын төлөөлөгч мэдэгджээ.

Хятад улсад энэ түүхий эдийн дэлхийн батлагдсан нөөцийн 37 хувь оногддог бөгөөд дэлхийн нийт хэрэгцээний 63 хувийг хангадаг.

Харин Орос улсад дэлхийн нөөцийн 10 орчим хувь буюу 12 сая тоннын нөөц байдаг ажээ.

ОХУ-ын худалдаа, аж үйлдвэрийн дэд сайд Алексей Беспрозванных газрын ховор элементийн нөөцөө олборлож, эдийн засгийн эргэлтэд оруулахын тулд нийт 11 төслийг татварын хөнгөлөлт, бага хүүтэй зээлээр дэмжих гэж байгааг өчигдөр мэдээлсэн байна.

Ингэснээр 2030 он гэхэд энэ салбар дахь Оросын зах зээлийн хувь хэмжээг одоогийн 1.3 хувиас 10 хувь болж өсгөх төлөвлөгөөтэй байгаа ажээ.

2030 онд Хятад улс зах зээлд давамгайлсан хэвээр байх ч Орос улс ядаж хоёрдугаарт эрэмбэлэгдэх нийлүүлэгч болох зорилготойг Беспрозванных мэдэгдсэн байна.

Хятадаас гадна газрын ховор элементийн ганц нийлүүлэгч нь Австралийн Lynas Corp компанийн хөрөнгө оруулалттай Малайз дахь үйлдвэр юм.

Одоогоор Хятадаас энэхүү түүхий эдийн хамаарлаа багасгахын тулд АНУ өөрийн олборлолтыг сэргээхээр ажиллаж байгаа.

Орос улс 2025 он гэхэд дотоодын хэрэгцээгээ хангадаг болж, 2026 оноос эхлэн газрын ховор элементийг гадаад зах зээлд экспортлохоор төлөвлөжээ.

2019 онд тус улс нийт 2,700 тонн газрын ховор элемент олборлосон байна. 2024 онд энэ хэмжээг 7,000 тоннд хүргэх зорилготой байгааг Беспрозванных ярьжээ.