ХААБ-ийн III улирлын арилжааны дүн өмнөх оны мөн үеэс 53.9 хувиар өсжээ.III улирлын байдлаар Хөдөө аж ахуйн биржээр нийт нэг их наяд 34.2 тэрбум төгрөгийн арилжаа хийсэн нь өмнөх оны мөн үеэс 53.9 хувиар өссөн үзүүлэлт болсныг Санхүүгийн зохицуулах хороо тайлагналаа.

Тайлант хугацаанд таван төрлийн бараа, бүтээгдэхүүн арилжаалсан ба үнийн дүнгийн дийлэнхийг буюу 92.6 хувийг ямааны ноолуурын арилжаа бүрдүүлжээ. Энэ нь өнгөрсөн оны мөн үеэс 2.2 нэгж хувиар өссөн үзүүлэлт болж байна.

Дашрамд дурдахад, Монгол Улс дэлхийн ноолуурын зах зээлийн 40 хувийг дангаараа бүрдүүлж байгаа юм.

Харин 11 дүгээр сарын 28-наас 12 дугаар сарын хоёрны хооронд Хөдөө аж ахуйн биржээр нийт гурван удаагийн арилжаа зохион байгуулагдаж долоон хэлцлээр 1.5 тэрбум төгрөгийн үнэ бүхий бараа түүхий эд болох 5.6 тонн ямааны ноолуур, 333.4 тонн хонины ноос тус тус арилжсан байна.

Үүнээс гадна 11 дүгээр сарын 30-нд Хөдөө аж ахуйн бирж Турк улсын Худалдааны биржтэй (Turkish Mercantile Exchange, TÜRİB) хамтран ажиллах санамж бичигт гарын үсэг зуржээ.

Бүгд Найрамдах Турк улсын Худалдааны бирж нь итгэмжлэгдсэн агуулахад байршуулсан бараа, түүхий эдийг гэрчлэх агуулахын бичиг болон фьючерсийн арилжааг нэвтрүүлэх, цахим хөдөө аж ахуйг хөгжүүлэх зэрэг үндсэн чиг үүрэгтэйгээр үйл ажиллагаа эрхэлдэг байна.

Нийтэлсэн огноо2022-12-07