Ипотекийн зээлд анх удаа хамрагдаж байгаа, орон нутагт амьдардаг зэрэг зээлийн шалгуур хангасан хүнд 100 хүртэлх сая төгрөгийг жилийн 3 хувийн хүүтэй олгоно.Энэ оны гуравдугаар сарын 10-ны өдрийн байдлаар 1115 зээлдэгчид 115.1 тэрбум төгрөгийн ипотекийн зээлийн санхүүжилт олгосныг Барилга, Хот байгуулалтын яам мэдээллээ.

Зээлийн эх үүсвэрийн 89.3 тэрбум төгрөг нь Монголбанкнаас, 25.8 тэрбум төгрөг нь арилжааны банкнуудаас олгогдсон байна.
Улаанбаатар хотод 77 хувь буюу 88.7 тэрбум төгрөгийн зээл олгосон бол орон нутагт үлдсэн хувь буюу 26.3 тэрбум төгрөгийн санхүүжилт олгожээ.

Хөдөө, орон нутагт шилжин суурьшиж буй иргэдэд зориулан гурван хувийн хүүтэй ипотекийн зээл олгох журмыг боловсруулж байгааг Сангийн яам мэдээллээ. Энэ оны I улиралд багтаан банкнуудаар дамжуулан олгохоор төлөвлөжээ.

Үүнд ипотекийн зээлд анх удаа хамрагдаж байгаа, орон нутагт амьдардаг зэрэг зээлийн шалгуур хангасан хүнд 100 хүртэлх сая төгрөгийг жилийн гурван хувийн хүүтэй 360 хүртэлх сарын хугацаатайгаар олгох аж.

Үүнээс гадна “Монголын ипотекийн корпорац” Филиппиний орон сууцны ипотекийн санхүүжилтийн үндэсний корпорац болон Малайзын орон сууцны санхүүжилтийн компанитай хамтран ажиллах санамж бичиг байгуулаад байна.

Энэ хүрээнд орон сууцны санхүүжилтийн тогтолцоо, ипотекийн зээлээр баталгаажсан бондын зах зээл, ипотекийн зах зээлийн талаарх туршлага хуваалцахад хамтын ажиллагаагаа өргөжүүлэх ажээ.

Нийтэлсэн огноо2023-03-21