Засгийн газар энэ оны төсвийн тодотголыг УИХ-ын намрын чуулган эхлэхээр өргөн барьж, батлуулахаар ажиллаж байгаа. Тэгвэл маргаашийн Засгийн газрын хуралдаанаар энэ оны төсвийн тодотголын төслийг хэлэлцэх аж.
Үндэсний статистикийн хорооны хагас жилийн мэдээгээр инфляц 12.4 хувьд хүрсэн. Хүнсний бүтээгдэхүүний үнэ жилийн дүнгээр 24.8 хувиар, тэр дундаа махны үнэ 51.6 хувиар өссөн. Мөн шатахуун, түлшний тасалдал, гадаад дотоодын хүчин зүйлээс шалтгаалж эдийн засаг хүндрэх эрсдэлтэй байгааг эдийн засагчид ч хэлж байгаа. Уул уурхайгаас манай улсын эдийн засаг шууд хамааралтай байдаг. Тэгвэл эдийн засаг хүнд байгаа ч уул уурхай экспорт, орлого харьцангуй хэвийн байгааг “Чингис хаан баялгийн сан” нэгдлийн гүйцэтгэх захирал Б.Даваадалай хэллээ.
Тэрээр “Төрийн өмчит уул уурхайн компаниудын орлого харьцангуй сайн байгаа. Яагаад гэхээр зэсийн үнэ өндөр байгаа учраас “Эрдэнэт" үйлдвэр нэлээд сайн ажиллаж, үзүүлэлт нь сайн гарч байна. Манай нэгдлийн хувьд энэ оны эхний  хагас жилийн байдлаар есөн их наядын орлого олсон. Монгол Улсын экспортын 70 хувийг нэгдлийн компаниуд хийсэн.
“Эрдэнэс Тавантолгой” компани биет хэмжээгээ нэлээд шахаж ажиллаж байна. Харьцангуй орлого сайн байна. Эдийн засаг бусад салбарт хүнд байгаа байх. Үүнийг гол чирч яваа нь уул уурхайн салбар. Энэ онд ч гэсэн төсөв болон бусад үзүүлэлт дээр уул уурхайн салбар гол ачааг үүрнэ. Бензин, шатахуун ч уул уурхайн салбарт хүндрээгүй. Компаниудтай гэрээ хийгээд, гэрээний дагуу нийлүүлээд явж байгаа. Он дуустал энэ чигээрээ явж чадвал экспортын болон орлогын гүйцэтгэлүүдээ бүрэн хангана. Мөн төсөв болон бусад зүйлүүд дээр дэмжлэгээ үзүүлнэ. Ер нь 2026 онд уул уурхайн компаниуд төсөв болон эдийн засгаа чирч явна гэсэн төсөөлөлтэй байгаа” гэв.

Пүрэвдагва БУЛГАН

Сэтгүүлч М.Булган нь iToim.mn сайтад 2015 оноос ажиллаж байна. Улс төр, нийгмийн чиглэлээр мэдээ, мэдээлэл бэлтгэдэг.

Нийтэлсэн огноо2026-08-18