Замын-Үүд-Эрээн боомтын авто замын тээврийг ойрын хугацаанд нээх төлөвтэй байгааг “SXCoal” мэдээллээ.

11 дүгээр сарын 27-нд нээж магадгүй талаар өмнө нь мэдээлж байсан юм. Нээх өдөр нь тодорхойгүй байгаа ч хоёр тал халдвар хамгааллын дэглэмийг чанд сахиулахад анхаарах юм байна.

Үүнээс гадна аравдугаар сараас эхлэн Гашуунсухайт Ганцмод боомтоор гарах Монголын нүүрс тээврийн автомашины тоо нэмэгдэж эхэлсэн бөгөөд 11 дүгээр сар гарсаар эрс өссөн үзүүлэлттэй байна. Тухайлбал: энэ сарын нэгнээс 23-ны хооронд Гашуунсухайт-Ганцмод боомтоор нийт 7679 тээврийн хэрэгслээр нүүрс тээвэрлэжээ.

Харин аравдугаар сард 6674 тээврийн хэрэгсэл хилээр нэвтэрсэн байна. Хэдий тийм боловч Замын-Үүд-Эрээн болон Шивээхүрэн-Сэхэ боомтын авто замын тээвэр хаалттай байгаа нь нүүрсний экспортын өсөлтөд сөргөөр нөлөөлөхөөр байна.

Шивээхүрэн-Сэхэ боомтоор хэвийн үед буюу цар тахлын өмнө жилд 10 сая тонн нүүрс гардаг байв. БНХАУ-д “коронавирус”-ийн халдварын тархалт нэмэгдсэнтэй холбоотойгоор аравдугаар сарын 18-наас хойш хаалттай байна.

Нүүрсний нийлүүлэлт нэмэгдэж байгаа ч БНХАУ-д нүүрсний импортын дундаж үнэ буурч байна. 11 дүгээр сарын 24-ний өдрийн байдлаар түүхий коксжих нүүрсний үнэ тонн нь 1250-1300 юань болж, сарын өмнөхөөс хоёр дахин буурсныг “SXCoal” мэдээллээ.

С.Өнөрсайхан | @unursaikhan_sor