Засгийн газрын ээлжит хуралдаанаас гаргасан шийдвэрийг танилцуулах үеэр нийслэлийн Засаг дарга бөгөөд Улаанбаатар хотын захирагч Б.Пүрэвдагва өвөлжилтийн бэлтгэл ажил, авто замын засвар, замын хөдөлгөөний зохицуулалтын талаар мэдээлэл өглөө.

Тэрээр "Нийслэл хот өвөлжилтийн бэлтгэл ажлын хүрээнд дулааны шугам сүлжээний засвар, шинэчлэлийн ажлыг үргэлжлүүлэн хийж байна. XXI зуунд халуун ус хязгаарлах асуудлыг халъя гэж шийдсэн боловч манай хотын газар доорх шугам сүлжээний 60 орчим хувь нь насжилт өндөр учраас үе шаттайгаар засварлахаас өөр аргагүй.

Авто замын засвар, шинэчлэлийн ажлыг хичээлийн шинэ жил эхлэхээс өмнө дуусгана. Өвөлжилтийн бэлтгэл ажил өнөөдрийн байдлаар 57 хувьтай үргэлжилж байна.

Хичээлийн шинэ жил эхлэх гэж байна. Мөн НҮБ-ын Цөлжилттэй тэмцэх конвенцын талуудын 17 дугаар бага хурал (UNCCD COP17) наймдугаар сарын 17-28-ны өдрүүдэд Улаанбаатар хотод зохион байгуулагдана. Үүнтэй холбоотойгоор замын ачаалал нэмэгдэх тул наймдугаар сарын 15-наас есдүгээр сарын 12-ны хооронд автомашины улсын дугаарыг тэгш, сондгойгоор хөдөлгөөнд оролцуулахаар төлөвлөж байна.

Хичээлийн шинэ жилийн бэлтгэл ажил болон цаг үеийн нөхцөл байдалтай холбоотойгоор замын хөдөлгөөнд хязгаарлалт хийхээс өөр аргагүй нөхцөл үүсээд байна" хэмээв.

Нийтэлсэн огноо2026-07-30