2022 онд Улаанбаатар хотын хаусын зах зээлийн барилга, угсралтын ажил эрчимжиж, нийлүүлэлт өсөөд байна. Зөвхөн II улиралд л гэхэд хаусын 13 төсөл шинээр нэмэгдсэн гэж “Тэнхлэг зууч” компани мэдээллээ.
Одоогоор 163 төслийн 9451 айлын хаусын төсөл хэрэгжиж байгаагаас 131 төслийн 5694 айлын хаусын төсөл нь захиалга авах шатандаа үргэлжилж байгаа аж. Улаанбаатар хотын цахилгаан, эрчим хүчний хэрэглээ жилд 7-8 хувиар нэмэгдэж байгаа ч үүнийг хангах хэмжээний шинэ бүтээн байгуулалт сүүлийн таван жилийн хугацаанд хийгдээгүй. Үүнтэй холбоотойгоор эрчим хүчний хэмнэлттэй амины орон сууцыг төсөл хэрэгжүүлэгчид хөгжүүлж байна.
Эрчим хүчний хэмнэлттэй барилгыг “Пассив сууц”, “Тэг эрчим хүчний сууц”, “Эрчим хүчний хэмнэлттэй барилга” гэж гурав ангилдаг. Санхүүгийн зохицуулах хорооноос гаргасан тооцооллоор эрчим хүчний хэмнэлттэй амины орон сууцны өртөг 131.1 сая төгрөг болох тооцоотой байна.

Энэ төрлийн орон сууц нь байгальд ээлтэй гэсэн ангилалд ордог тул “Ногоон зээл”-д хамрагдах боломжтой гэж Санхүүгийн зохицуулах хороо мэдээлсэн юм. Энэ чиглэлээр Азийн Хөгжлийн банкны санхүүжилттэй жилийн найман хувийн хүүтэй зээл, арилжааны банкнууд жилийн 12 хувийн хүүтэй зээл санал болгож байна.

Зургаадугаар сарын эцсийн байдлаар Улаанбаатар хотод захиалга авч буй амины орон сууцны төслүүдийн 51.5 хувь нь нийслэлийн шинэ суурьшлын бүс буюу Хан-Уул дүүргийн Арцатын ам, Жаргалантын ам, Өлзийт хороололд байгаа бол 19.7 хувь нь Баянзүрх дүүрэгт байршилтай байгаа аж.

Эдгээрээс “Hybrid House” компанийн “Hybrid Villa” төсөл эрчим хүчний хэмнэлттэй технологи нэвтрүүлжээ. Хэдий тийм боловч стандарт, дундаж зэрэглэлийн хаусны төслүүд зөвхөн захиалга өгсний дараа тодорхой хугацаанд баригдаж байгаа нь хотхоны төлөвлөлт, айлын тоо, зарлаж буй үнэ байнга өөрчлөгдөх сул талтайг “Тэнхлэг зууч” онцолж байна.

Эрчим хүчний хэмнэлттэй амины орон сууцны үнэ нэг м.кв нь дөрвөн сая төгрөгөөс эхэлж байгаа бол бусад амины орон сууцны төслүүд 2.5-8 сая төгрөгөөр зарагдаж байгаа ажээ.

Нийтэлсэн огноо2022-08-11