Улаанбаатар хотод 642 мянга 315 тээврийн хэрэгсэл бүртгэлтэй байна
Оны эхний найман сард нийт 395 сая ам.долларын автомашин импортолсон нь өмнөх оны мөн үеэс 36.7 хувиар өссөн үзүүлэлт болж байгааг Үндэсний статистикийн хорооны тоон үзүүлэлт харууллаа. Энэ нь түгжрэлийг бууруулах бүтэн жилийн төсвөөс 3 дахин их мөнгө гэсэн үг юм.
Сүүлийн байдлаар Улаанбаатар хотод 642 мянга 315 тээврийн хэрэгсэл бүртгэлтэй байгаа нь 2011 оны тоон үзүүлэлтээс 50 орчим хувиар өссөн дүн болж байна. Өөрөөр хэлбэл Монгол Улсын хэмжээнд нийт нэг сая 122 мянга гаруй автомашин бүртгэлтэй байгаагаас дийлэнх нь буюу 57 хувь нь нийслэл хотод бүртгэлтэй байгаа юм.
Өнөөдрийн байдлаар Улаанбаатар хотын замын хөдөлгөөний дундаж хурд нь 8.9 км цаг байгаа бол 2025 онд зургаан км цаг болж, 2030 он гэхэд гурван км цаг болох тооцоо гарчээ. Түгжрэлийг бууруулах чиглэлд 2023 оны улсын төсөвт нийт 586 тэрбум төгрөгийг тусгахаар төлөвлөж байгааг Ерөнхий сайд мэдэгдээд байна. Харин 2022 оны улсын төсөвт энэ чиглэлд 420 тэрбум төгрөгийг суулгаж байсан билээ.

Монгол Улсын импортолж буй автомашины тоо болон үнийн дүн жил бүр тогтмол өсөж байгаа нь гадаад худалдааны тэнцэлд жин дарж байгаа юм. Хэдийгээр түгжрэлийг бууруулах арга зам тодорхой байдаг ч хэрэгжилт талд хангалттай арга хэмжээ авдаггүй гэж салбарынхан онцолж байна.

Нийтэлсэн огноо2022-09-20