СЯ: 2025 он гэхэд нийт төсвийн хөрөнгө оруулалттай төслүүдийн 95 хувь нь дуусах төлөвтэй.2024 оны төсвийн төслийг Засгийн газар УИХ-д өргөн барихаас өмнө төсвийн хөрөнгө оруулалтаар баригдсан дуусаагүй барилгуудын асуудлыг хэлэлцлээ.

Одоогоор улсын хэмжээнд төсвийн хөрөнгө оруулалтаар 736 төсөл арга хэмжээ хэрэгжиж байна. Эдгээрийн дунд наймаас дээш жил үргэлжилж байгаа болон үнийн өсөлтийн улмаас хэд хэдэн удаа тодотгол хийгдсэн 25 төсөл арга хэмжээг Засгийн газар онцгойлон авч хэлэлцэв.

Эдгээр төслийн 60-70 хувь нь захиалагчаас буюу Төрийн байгууллагаас шалтгаалж удааширсан бөгөөд зураг төсөл нь 2-3 удаа өөрчлөгдсөн тохиолдлууд ч байгааг Сангийн сайд мэдээллээ. Тиймээс эдгээр төслийг нэгэнт эхлүүлсэн учир нэн яаралтай дуусгах чиглэл өгсөн байна.

Мөн нийт төсвийн хөрөнгө оруулалтаар хэрэгжиж буй 736 төсөл арга хэмжээнүүдийн 95 хувь нь 2025 он гэхэд дуусах боломжтой гэж Засгийн газар үзэж байна.

Цаашдаа Төсвийн хууль болон бусад хуулийн дагуу зөвхөн зураг төсөл нь бүрэн батлагдсан, бэлтгэл ажил нь 100 хувь хангагдсан төсөл арга хэмжээг Засгийн газарт өргөн мэдүүлэхээр тогтож байгааг Сангийн сайд мэдээллээ.

Нийтэлсэн огноо2023-09-21