Засгийн газрын Хэрэг эрхлэх газрын дарга С.Бямбацогт өнөөдөр“Оюу толгой” ХХК-ийн гүйцэтгэх захирал Дэйрдрэ Лингенфэлдертэй уулзлаа.
Энэ үеэр  Оюу толгойн ордоос Монголын ард түмэнд оногдох өгөөжийг намэгдүүлэх, зээлийн хүүг бууруулах, Онтре ресурс ХХК-ийн асуудлыг харилцан ашигтай байдлаар шийдвэрлэх чиглэлээр баримталж ирсэн Монгол Улсын Засгийн газрын байр суурь хэвээрээ байгааг онцоллоо.
Тиймээс гэрээг илүү сайжруулан тодотгох, Онтре болон татвар, зээлийн хүүтэй холбоотой зайлшгүй шийдвэрлэх шаардлагатай асуудал дээр ойрын үед нэгдсэн шийдэлд хүрэхээр холбогдох ажлын хэсгүүд ажиллаж байгааг тодотголоо.
Тухайлбал:
Оюутолгойн бүлэг ордын талбайн хил зааг дотор оршдог “Шивээ толгой”, “Жавхлант” нэртэй ашигт малтмалын ашиглалтын тусгай зөвшөөрөл эзэмшдэг “Онтре” компанитай төрийн эзэмшлийн хувь, хэмжээг тогтоох, хөрөнгө оруулагч талтай хэлэлцээ хийх чиг үүрэг бүхий Ажлын хэсгийг Аж үйлдвэр, эрдэс баялгийн сайд Г.ДАМДИННЯМ,
Оюу толгой төслийн санхүүжилтийн хүүгийн зохистой байдлыг хянан үзэх, өөрчлөх асуудлаар хөрөнгө оруулагч талтай хэлэлцээ хийж, санал боловсруулах үүрэг бүхий Ажлын хэсгийг Сангийн сайд Б.ЖАВХЛАН,
Лондонгийн олон улсын арбитрын шүүхэд үүссэн маргаанд Монгол Улсын эрх ашгийг хангуулах, Засгийн газрын байр суурийг хамгаалах үүрэг бүхий Ажлын хэсгийг Хууль зүй, дотоод хэргийн сайд Л.МӨНХБААТАР нар ахлан ажиллаж байгааг дуулгалаа.
Үүнтэй холбоотойгоор шаардлагатай бүх мэдээллийг Засгийн газар болон холбогдох Ажлын хэсгүүдэд гаргаж өгөхөд бэлэн гэдгээ Оюу толгой ХХК-ийн удирдлагууд илэрхийлсэн байна.
Уулзалтын үеэр Монгол Улсын Засгийн газраас хэрэгжүүлэх мега төслүүдийн эхэнд эрэмбэлэгдэж буй зэс хайлуулах, алт цэвэршүүлэх үйлдвэрүүд байгуулахад Оюу толгой ХХК ямар оролцоотой байж болох талаар санал солилцлоо.
undefined
Түүнчлэн Оюу толгойн уурхай өнөөг хүртэл хэрэгцээт эрчим хүчээ урд хөршөөс импортолж ирсэн.
Тэгвэл Тавантолгойн цахилгаан станц баригдвал 2028 оноос манай дотоодын эх үүсвэрээс эрчим хүчээ авах чиглэлээр чиглэлээр хамтарч ажиллахаар тохиролцлоо.
Мөн Оюу толгой ХХК одооноос бага агуулгатай исэлдсэн хүдрийн овоолгоо ирээдүйд хэрхэн ашиглах талаар анхаарал хандуулах ёстойг дуулгалаа.
Оюу толгой ХХК-ийн хувьд 2025 онд зэсийн үйлдвэрлэл өмнөх оны мөн үеэс 50 хувь нэмэгдсэн бөгөөд энэ онд 350 мянган тонн зэс олборлож, бүх зардлаа хасаад 1 тэрбум ам долларын ашигтай ажиллахаар төлөвлөж байгааг дуулгасан байна.
Эх сурвалж: ЗГХЭГ

Нийтэлсэн огноо2025-08-31