2006 онд Малайзын Ерөнхий сайд асан Наджиб Разакын ойрын хамгаалалтын албанд ажиллаж байсан хоёр хүн Монгол Улсын иргэн Шаарийбуугийн Алтантуяаг онц хэрцгийгээр хөнөөсөн харамсалтай хэрэг гарсан билээ. Хохирогчийн аав Сэтэвийн Шаарийбуу тус хэрэгт дахин мөрдөн шалгалт явуулах хүсэлтийг Малайзын шүүхэд гаргажээ.
Түүний өмгөөлөгч Сангит Каур Дэогийн мэдээлснээр уг хүсэлт нь хэрэгт буруутгагдсан нууц албаны цагдаа Азилах Хадригийн бичиж үлдээсэн тангарагт мэдүүлэгтэй холбоотой аж. Тэрээр Ш.Алтантуяаг хөнөөх тушаалыг Ерөнхий сайд асан Наджиб Разак өгсөн гэж мэдүүлж байв. Гэвч Наджиб үүнийг тууштай үгүйсгэж ирсэн бөгөөд түүнд эрүүгийн хэрэг үүсгээгүйгээс гадна шүүх дээр ч холбоотой нь нотлогдоогүй юм.
Азилахын цаазаар авах ялыг өнгөрсөн жил бүх насаар нь хорих ял болгож өөрчилсөн. Тэрээр өөрийн өргөдлийг дэмжихийн тулд уг мэдүүлгээ ашигласан бөгөөд прокурорын байгууллага түүний агуулгыг няцаагаагүй гэж Сангит мэдэгджээ.
Хэрэв шүүх С.Шаарийбуугийн хүсэлтийг хүлээн авбал, бараг 20 жил хариултгүй байсан энэ хэрэгт шинэ мөрдөн шалгалт эхэлнэ гэсэн үг. Урьдчилсан хэлэлцүүлэг есдүгээр сарын 29-нд болох юм.
2006 оны аравдугаар сард Алтантуяаг Абдул Разак Багиндагийн гэрийн гаднаас барьж, дараа нь Куала Лумпурын ойролцоох ой руу авч яван, толгой руу нь хоёр удаа буудаж, тэсрэх бодисоор дэлбэлж амийг нь онц хэрцгийгээр хөнөөсөн. Хэргийг Наджибийн ойрын хамгаалалтын албанд ажиллаж байсан тусгай хүчний цагдаа нар болох Азилах, Сирул Азхар Умар хоёр үйлдсэн нь тогтоогдсон ч аллагын жинхэнэ шалтгаан тодорхой болоогүй. Абдул Разакыг мөн хамжигчаар буруутгасан ч шүүхээс цагаатгасан байдаг.
Эрүүгийн хэргийн мөрдөн шалгалтыг дахин нээх хүсэлт нь Шаарийбуугийн гэр бүлийн иргэний хэрэг бараг дуусахтай зэрэгцэж байна.
2022 онд Шаарийбуугийн гэр бүл Азилах, Сирул, Абдул Разак болон Малайзын Засгийн газрыг эсрэг өргөдөл гаргасан иргэний хэрэгт ялж, нийт 9 сая рингит (2.1 сая ам.доллар)-ын нөхөн төлбөр авах шийдвэр гаргуулсан. Гэвч Абдул Разак болон Засгийн газар уг шийдвэрийг давж заалдаад байгаа бөгөөд шүүхийн шийдвэр ирэх аравдугаар сард гарах юм. Хэрэв ялагдвал тус бүр 4.7 сая рингит төлөх ёстой.
Наджиб 2020 онд эрх мэдлээ урвуулан ашигласан, итгэл эвдсэн болон мөнгө угаасан хэргээр 12 жилийн хорих ял авсан ч өнгөрсөн жил түүний ялыг таллаж, одоо үлдсэн гурван жилийг гэрийн хорионд өнгөрүүлэхээр шүүхэд өргөдөл гаргаад байна.
Талийгаач Алтантуяагийн аав Шаарийбуу энэ зун хэвлэлд ярилцлага өгөхдөө “Наджиб улс төрдөө эргэж ирнэ гэдэг бол солиорол. Харин үлдсэн ялаа гэртээ эдлэх эсэх нь надад сонин биш” гэжээ.
Эх сурвалж: Bloomberg
BY
Х.Бямбажаргал нь МУИС-ийг Олон улсын харилцаа мэргэжлээр төгссөн бөгөөд 2024 оноос iToim.mn сайтад сэтгүүлч, орчуулагчаар ажиллаж байна.

Нийтэлсэн огноо2025-08-31