Засгийн газрын өнөөдрийн хуралдаанаар "Эрдэнэс Монгол" компанийн үр ашиг, засаглалыг сайжруулах төлөвлөгөөний хэрэгжилтийн талаар мэдээлэл сонсжээ. Энэ хүрээнд Бор тээгийн ордыг эдийн засгийн эргэлтэд оруулах бэлтгэл ажлын талаар мэдээлэл сонссон байна. Үүнтэй холбогдуулан "Эрдэнэс Тавантолгой" компанийн гүйцэтгэх захирлын үүрэг гүйцэтгэгч Н.Цэрэнсамбуу мэдээлэл хийлээ. 
Тэрээр ""Эрдэнэс Тавантолгой" компанийн лицензийг нь эзэмшдэг Бор тээгийн ордыг эдийн засгийн эргэлтэд оруулах талаар Засгийн газрын хуралдаанд танилцуулга хийлээ.  Энэ ордын ТЭЗҮ нь 2020 онд батлагдсан. Өнгөрсөн арваннэгдүгээр сард ТЭЗҮ-ийг нь шинэчлэн батлуулах үүрэг өгсний дагуу ажиллаж байгаа. Ирэх оны эхний улиралд хийж дуусгана. Энэ орд 424 сая тоннын нөөцтэй.
"Эрдэнэс Тавантолгой" компани сүүлийн гурван жилд 30 сая тонн нүүрс экспортолж байгаа. Энэ хэмжээг нэмэгдүүлэхийн тулд Бор тээгийн ордыг эдийн засгийн эргэлтэд оруулж, гадаадын хөрөнгө оруулалтыг татах ажлын зохион байгуулна. Хил холболтын төмөр зам ашиглалтад ороход Бор тээгийн ордоос жил бүр 15 сая тонн нүүрс экспортлох бэлтгэл ажил хангагдсан байх болно" гэлээ.

Нийтэлсэн огноо2025-12-04