Малайз улсад амиа алдсан Монгол Улсын иргэн Ш.Алтантуяа агсны аав С.Шаарийбуу тус улсын дээд шүүхэд хандахаар болжээ. Тэрбээр "Малайзын дээд шүүхэд давж заалдахаар холбогдох баримтаа бүрдүүлээд явах гэж байна. Энэ намар, өвөл гээд тав дахь удаагаа Малайз руу явахаар боллоо" гэдгийг өөрийн сошиал хуудаснаа бичжээ.
Малайз улсын холбооны шүүх өнгөрсөн сард /2026.01.20/ тус улсад амь насаа алдсан Монгол Улсын иргэн Ш.Алтантуяагийн эцэг С.Шаарийбуугийн нэхэмжлэлтэй Иргэний хэргийн давж заалдах шатны шүүх хурлын шийдвэрийг талуудын өмгөөлөгч нарт танилцуулсан. Малайз улсад амь насаа алдсан Монгол Улсын иргэн Ш.Алтантуяагийн эцэг С.Шаарийбуугийн нэхэмжлэлтэй иргэний хэргийн анхан шатны шүүх хурлын шийдвэрийг хүчингүйд тооцож, Малайз улсын засгийн газрыг хариуцлагаас чөлөөлсөн юм.
Тэгвэл, "The Vibes" мэдээллийн сайт Ш.Алтантуяагийн гэр бүл давж заалдах шатны шүүхийн шийдвэрийн дагуу Малайзын засгийн газарт 4.7 сая рингитийг буцаан олгосон гэж нийтэлжээ.
Уг нийтлэлд дурдсанаар, Шах Аламын дээд шүүхийн түдгэлзүүлэх шийдвэрийн дагуу өмнө нь төлсөн, шүүхийн шийдвэрийн бүрэн дүн болон хуримтлагдсан бүх хүүг багтаасан мөнгөн дүнг засгийн газарт бүрэн шилжүүлсэн гэж Ш.Алтантуяагийн гэр бүлийн өмгөөлөгч Сангийт Каур Део мэдэгдсэн байна.
"Энэхүү дүнг хүлээн авсан мөчөөс эхлэн шүүхийн шийдвэрийг чанд мөрдөн, оролцогч талын дансанд хадгалсан. Ямар ч зорилгоор нэг ч цент ашиглаагүй" гэж өмгөөлөгч нь онцлон тэмдэглэсэн байна.
Түүнчлэн Абдул Разак Багиндагийн 1.38 сая рингитийн нөхөн төлбөрийг мөн адил буцаасан бөгөөд давж заалдах шатны шүүхийн шийдвэрлэсэн суутгалын дагуу шилжүүлэг хийгдсэн гэжээ.
Давж заалдах шатны шүүхийн үзэж буйгаар, хэрэг гарах үед цагдаа байсан Сирул Азхар Умар, Азила Хадри нарын үйлдлийн өмнөөс засгийн газар хариуцлага хүлээхгүй.
Гэхдээ Абдул Разак Багинда нь Ш. Алтантуяагийн үхэлд хууль зүйн хариуцлага хүлээх ёстой гэсэн шийдвэрийг шүүх хэвээр үлдээжээ. Ш.Алтантуяа агсны аав С.Шаарийбуу гуай Малайзыг зорьж, тус улсын дээд шүүхэд давж заалдах материалаа өгөхөөр явна гэж цахим хуудаснаа нийтэлсэн. Түүний өмгөөлөгч мөн "С. Алтантуяагийн аавын удаа дараа хэлснээр энэ хэрэг мөнгөний тухай биш, харин үнэн мөнийг тогтоох, хариуцлага тооцох, болсон явдлыг хүлээн зөвшөөрүүлэх тухай юм" гэж онцлон тэмдэглэжээ.

Нийтэлсэн огноо2026-02-06