Үндэсний статистикийн хорооноос 2025 оны жилийн эцсийн байдлаар эдийн засгийн өсөлтийг танилцууллаа.
Монгол Улсын эдийн засаг 2025 онд өмнөх жилийн мөн үеэс 6.8 хувиар өссөн байна. Нийт өсөлтийг задалж харвал, 2.9 хувь хөдөө аж ахуйн үйлдвэр үйлчилгээ, уул уурхай дотроо Оюу толгойн өсөлт 1.1 хувийг эзэлж, эдийн засгийн гол хөшүүрэг болжээ. Онцлууштай нь, аялал жуулчлал, аж үйлдвэр, уул уурхай, хөдөө аж ахуй, барилга, тээвэр гээд бүх салбар жигд өсөлттэй гарсан нь 2025 оны эдийн засгийн өсөлтийн онцлог байв.
Монголын экспортын орлогын хэмжээ 2025 онд 15.7 тэрбум ам.долларт хүрсэн байна. Үүнд,
Аялал жуулчлалын салбарын орлого, жуулчдын тоо жилээс жилд өсөж, 2025 онд 700 сая ам.долларт хүрсэн байна.
Нүүрсний экспорт 90 сая тоннд хүрч, нүүрсний экспортын орлогын хэмжээ 5.8 тэрбум ам.долларт хүрсэн байна. Гэхдээ нүүрсний орлого үнийн бууралтаас хамааран өмнөх оны мөн үеэс 34 хувиар буурчээ.
Зэсийн хүдрийн экспорт 2.3 сая болж, өмнөх оны мөн үеэс 30 орчим хувиар өсөж, экспортын орлого 5.8 тэрбум ам.доллар болсноор зэсийн баяжмалын орлого хоёр дахин өссөн байна.
Самнасан ноолуурын экспортын биет хэмжээ 4000 тонн болж, өмнөх оныхоос 4.7 дахин буюу 538 хувиар өссөн байна. Самнасан ноолуурын экспортын орлого 332.5 мянган ам.долларт, орлого нь 3.8 дахин өссөн нь голлон нөлөөлжээ.
2025 онд төлбөрийн тэнцэл 1 тэрбум ам.долларын ашигтай гараад байна.

Ганболд БАТЖАРГАЛ

Сэтгүүлч Г.Батжаргал нь iToim.mn сайтад 2015 оноос ажиллаж байна. Улс төр, нийгэм, эдийн засгийн чиглэлээр мэдээ, мэдээлэл бэлтгэдэг.

Нийтэлсэн огноо2026-02-23