Төрийн ордныхон орлого зарлагаа хэлэлцээд ойрын өдрүүдэд "тун завгүй". Тодруулбал, ирэх оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төслийг хэлэлцэж эхэлсэн. Мөн Засгийн газраас Татварын багц хуулийг өргөн мэдүүллээ. Сөрөг хүчний голцуу гишүүдээс ХХОАТ-ыг нэг хувь болгон бууруулах хуулийг зүтгүүлж буй.

Энэ олон хууль бүгд иргэд, ААН-ийн нуруун дээрх ачааг багасгах зорилготой гэж танилцуулж буй. Өнгөрсөн жилүүдэд ч ийн амласаар алх цохьж ирсэн. Гэхдээ тэдний ярьсан шиг ээлтэй орчин бүрдээгүй гэдгийг тоо "илчилж" байна.

Тухайлбал, чанаргүй зээлийн өрийн үлдэгдэл өнгөрсөн сараас 103.3 тэрбум төгрөгөөр өсөж 2.4 их наяд төгрөгт хүрсэн байна. Энэ нь өмнөх оны мөн үеэс 16.6 хувиар өссөн үзүүлэлт юм.

Зээл бол иргэдийн хувьд ч , бизнес эрхлэгчдийн хувьд ч хамгийн том эргэлтийн хөрөнгө. Эхний авсан зээлээрээ үйл ажиллагаа өргөжүүлж, дараагийн ажил албаа зохицуулдаг. Эдийн засгийн хямралын улмаас орлого тасалдаж, зээлээ төлөхөд хүндрэлтэй болж байгаа аж. Ерөөс иргэдийн худалдан авах чадвар огцом буурч, хаалгаа барихад тулаад буйгаа ААН-үүд учирлаж буй.
ҮСХ-оос мэдээллээс харвал, төгрөгийн ам.доллартой харьцах сарын дундаж ханш дөрөвдүгээр сард 3573.52 төгрөг болж, өнгөрсөн сараас 6.90 төгрөгөөр суларсан байна. Харин юаньтай харьцуулахад өмнөх сараас 5.19 төгрөгөөр суларчээ.

2026 оны дөрөвдүгээр сарын эцэст нийт зээлийн үлдэгдэл 46.3 их наяд төгрөг хүрч, өмнөх жилийн өдийгөөс 6.4 их наяд төгрөгөөр өсжээ. Нийт зээлийн өрийн үлдэгдлийн багахан хувийг төрийн болон санхүүгийн байгууллага, дийлэнхийг иргэд, ААН үүрч байна.

Тодруулбал,

60.5 хувь нь иргэд,
38.7 хувь нь хувийн байгууллага
Арилжааны банкнууд болон Монголын ипотекийн корпорацаас иргэдэд олгосон
ипотекийн зээлийн үлдэгдэл гуравдугаар сарын эцсийн байдлаар 11.8 их наяд төгрөг байна.

Ипотекийн зээлийн үлдэгдлийн:

1.6 хувь нь анхаарал хандуулах зээл
0.9 хувь нь чанаргүй зээл эзэлж байна.
Ахмад настнууд тэтгэврээ урьдчилаад зээлчихсэн. ААН-үүд татварт дарлуулж, дансаа баглуулсан. Иргэд зээлээс зээлийн хооронд хоног өдрүүдийг аргацаасан өдрүүд үргэлжилж байна. Нөгөө талд инфляц хоёр оронтой тоонд хүрч, махны үнэ 40 мянга дөхөөд байгаа билээ.

Д.ХАДААН

Нийтэлсэн огноо2026-05-14