Монгол Улсын барилгын материалын салбарт импортыг орлох, байгальд ээлтэй шинэ үйлдвэрлэл бий болж, “ALPHA” брэндийн эко гипсэн хавтангийн үйлдвэр өчигдөр нээлтээ /2026.5.24/ хийлээ. "Нью Прогресс" группийн охин компани болох "Эко Драйволл" ХХК-ийн хэрэгжүүлсэн тус үйлдвэр нь байгалийн цэвэр гөлтгөнөөр гипсэн хавтан үйлдвэрлэж буй үндэсний анхны үйлдвэр гэдгээрээ онцлогтой юм.

Төв аймгийн Сэргэлэн суманд байрлах уг үйлдвэр жилд 10 сая ам метр буюу 3.5 сая ширхэг гипсэн хавтан үйлдвэрлэх хүчин чадалтай бөгөөд дотоодын хэрэгцээний 65-80 хувийг хангах боломжтой аж.

Нээлтийн үеэр компанийн удирдлагууд “ALPHA” нь зөвхөн импорт орлох бүтээгдэхүүн бус, Монголын байгалийн баялгийг нэмүү өртөг шингээн боловсруулсан үндэсний шинэ брэнд болохыг онцолсон юм.

Өнөөдрийг хүртэл Монгол Улс гипсэн хавтангийн хэрэгцээгээ бүрэн импортоор хангаж ирсэн нь валютын урсгал гадагшлах, нийлүүлэлтийн хараат байдал үүсэхэд нөлөөлж байсныг салбарынхан хэлж байна.

Харин шинэ үйлдвэр ашиглалтад орсноор импортын хамаарлыг бууруулж, үндэсний үйлдвэрлэлийг дэмжихээс гадна 100 гаруй ажлын байр шинээр бий болгох ач холбогдолтой гэж үзэж байгаа юм.

Төслийг 2024 онд эхлүүлж, 2025 оны аравдугаар сард туршилтын үйлдвэрлэлээ эхлүүлэн анхны борлуулалтаа хийжээ. Харин 2026 оны тавдугаар сарын 24-нөөс үйлдвэр бүрэн хүчин чадлаараа ажиллаж эхэлсэн байна. ALPHА үйлдвэрийн гол онцлог нь өөрийн уурхайн байгалийн цэвэр гөлтгөнө ашигладаг.

Дэлхийд өргөн хэрэглэгддэг зарим гипсэн хавтан синтетик гипсээр үйлдвэрлэгддэг бол тус үйлдвэр олон сая жилийн геологийн тогтоц бүхий байгалийн эрдсийг ашиглаж байна.

Компанийн зүгээс байгалийн гипс нь өндөр цэвэршилттэй, хүнд металлын агууламж багатай, хүний биед аюулгүй, экологийн шаардлага хангасан бүтээгдэхүүн үйлдвэрлэх боломжтойг онцоллоо.

Мөн үйлдвэр уурхайн цогц бодлогын хүрээнд техникийн болон биологийн нөхөн сэргээлт хийх, тоосжилт бууруулах технологи нэвтрүүлэх, үйлдвэрлэлийн хаягдлыг дахин боловсруулах, сэргээгдэх эрчим хүч ашиглах зэрэг ногоон хөгжлийн шийдлүүдийг үе шаттай хэрэгжүүлэх аж. Түүнчлэн “ALPHA” эко гипсэн хавтан нь энгийн, галд тэсвэртэй, ус чийгэнд тэсвэртэй төрлүүдээр үйлдвэрлэгдэж байгаа бөгөөд цаашид экспортын зах зээлд гаргах зорилт тавин ажиллаж байна.

Нийтэлсэн огноо2026-05-25