Улсын нэгдсэн төсвийн орлого, тусламжийн хэмжээ оны эхний хагас жилийн урьдчилсан гүйцэтгэлээр 16.8 их наяд төгрөгт хүрчээ.

Зарлага, эргүүлэн төлөх цэвэр зээлийн хэмжээ эхний хагас жилд 16.8 их наяд төгрөг болжээ.

Улсын нэгдсэн төсвийн тэнцвэржүүлсэн тэнцэл 2.1 их наяд төгрөгийн алдагдалтай гарсан байна.

Улсын нэгдсэн төсвийн орлого, тусламжийн хэмжээ оны эхний хагас жилийн урьдчилсан гүйцэтгэлээр 16.8 их наяд төгрөгт хүрсэн нь жилийн өмнөх мөн үеэс 2.8 их наяд төгрөгөөр буюу 20.1 хувиар өссөнийг ҮСХ мэдээллээ.

Тэнцвэржүүлсэн орлого, тусламжийн хэмжээ мөн хугацаанд 14.6 их наяд төгрөгт хүрч, өмнөх оны мөн үеэс 1.4 их наяд төгрөгөөр буюу 10.7 хувиар нэмэгдсэн байна.

Зарлага, эргүүлэн төлөх цэвэр зээлийн хэмжээ эхний хагас жилд 16.8 их наяд төгрөг болжээ. Ингэснээр улсын нэгдсэн төсвийн тэнцвэржүүлсэн тэнцэл 2.1 их наяд төгрөгийн алдагдалтай гарсан байна.

Татварын орлого 2026 оны эхний хагас жилд 13.4 их наяд төгрөгт хүрч, жилийн өмнөх мөн үеэс 1.3 их наяд төгрөгөөр буюу 10.3 хувиар өсчээ. Татварын орлогын өсөлтөд нийгмийн даатгалын орлого 415.8 тэрбум төгрөгөөр буюу 16.2 хувиар, нэмэгдсэн өртгийн албан татвар 336 тэрбум төгрөгөөр буюу 11.7 хувиар, орлогын албан татварынх 269.8 тэрбум төгрөгөөр буюу 7.2 хувиар өссөн нь голлон нөлөөлсөн байна. Харин онцгой албан татварын орлого 114.7 тэрбум төгрөгөөр буюу 20.7 хувиар буурчээ.

Татварын нийт орлогын 29.9 хувийг орлогын албан татвар бүрдүүлж байна. Нэмэгдсэн өртгийн албан татвар нийт татварын орлогын 24 хувийг, нийгмийн даатгалын орлого 22 хувийг, гадаад үйл ажиллагааны орлого 7.2 хувийг, онцгой албан татварын орлого 3.2 хувийг эзэлж байна. Бусад төрлийн татвар, төлбөр, хураамжийн орлого татварын нийт орлогын 13.5 хувийг бүрдүүлжээ.

Улсын нэгдсэн төсвийн зарлага, эргэж төлөгдөх цэвэр зээлийн хэмжээ эхний хагас жилд 16.8 их наяд төгрөг болж, өмнөх оны мөн үеэс 2.8 их наяд төгрөгөөр буюу 20 хувиар өссөн байна. Зарлагын өсөлтөд хөрөнгийн зардал жилийн өмнөх мөн үеэс 1 их наяд төгрөгөөр буюу 58.2 хувиар, бараа үйлчилгээний зардал 1 их наяд буюу 20, урсгал шилжүүлэг 529.8 тэрбум төгрөгөөр буюу 8.9 хувиар нэмэгдсэн нь голлон нөлөөлжээ.

Зардлын 38.8 хувийг урсгал шилжүүлэг эзэлж байна. Бараа үйлчилгээний зардал нийт зардлын 36.5, хөрөнгийн зардал 16.6, хүүгийн зардал 4.8, татаас 3.3 хувийг бүрдүүлжээ.

Нийтэлсэн огноо2026-07-23