Монгол Улсад он гарснаас хойш эхний найман сарын байдлаар 718.9 мянган жуулчин ирээд байна. Энэ нь өнгөрсөн оны мөн үеийнхээс 19 хувиар өссөн үзүүлэлт юм. Харин наймдугаар сард дангаараа 149.9 мянган жуулчин Монголыг зорьжээ.

Энэ жилийн жуулчдын урсгалд Монгол Улсад болсон олон улсын томоохон арга хэмжээнүүдийн нэг болох НҮБ-ын Цөлжилттэй тэмцэх тухай конвенцын Талуудын 17 дугаар бага хурал буюу COP17 тодорхой хэмжээгээр нөлөөлсөн байна. Тус хуралд олон орны төлөөлөгчид оролцож, Монголд ирэх гадаадын зочдын тоо нэмэгдэхэд нөлөөлжээ.

Гэхдээ жуулчдын тоо зөвхөн COP17-тэй холбоотойгоор өссөнгүй. Сүүлийн жилүүдэд Монгол Улс аялал жуулчлалаа дэмжих бодлого хэрэгжүүлж, гадаадад Монголыг сурталчлах ажлаа нэмэгдүүлж байгаа. Үүний үр дүнд оны эхнээс жуулчдын тоо тогтмол өссөн үзүүлэлттэй байна. Тухайлбал, энэ оны эхний гурван сард Монголд 143.4 мянган жуулчин ирсэн нь өнгөрсөн оны мөн үеэс 39 хувиар өссөн үзүүлэлт байжээ. Гуравдугаар сард л гэхэд 59.3 мянган жуулчин хүлээн авсан нь өмнөх оноос 50 хувиар нэмэгдсэн байна.

Монголыг зорьж буй жуулчдын дийлэнх нь хөрш орнууд болон Зүүн Азийн улсуудаас ирж байна. Эхний найман сарын байдлаар ОХУ-аас 240.9 мянга, БНХАУ-аас 174.1 мянган жуулчин иржээ. Үүний дараа БНСУ, Япон, Казахстаны жуулчид голлох хувийг эзэлж байна.

Өөрөөр хэлбэл, Монголд ирж буй жуулчдын ихэнхийг ойрхон зах зээлүүд бүрдүүлж байгаа гэсэн үг. Ялангуяа ОХУ, БНХАУ-аас ирэх жуулчдын тоо өндөр байгаа нь хилээр болон шууд нислэгээр зорчих боломжтой холбоотой.

Нөгөө талд Монгол Улсыг зорих Европ, Америк болон бусад орны жуулчдын тоог нэмэгдүүлэх боломж ч бий. Тиймээс аялал жуулчлалын салбарынхан цаашид Монголыг зөвхөн хөрш орнуудад бус, илүү олон улсын зах зээлд сурталчлахад анхаарч байна. Засгийн газар энэ онд нэг сая жуулчин хүлээж авах зорилт тавьсан. Найман сарын байдлаар 718.9 мянган жуулчин ирээд байгаа бөгөөд үлдсэн дөрвөн сард 281 мянга орчим жуулчин хүлээж авбал жилийн зорилтоо биелүүлэх юм.

Харин жуулчдын тоо нэмэгдэхийн зэрэгцээ Монголд ирсэн жуулчин дотоодод хэр их хугацаа өнгөрөөж, хэр хэмжээний зардал гаргаж байгаагаас аялал жуулчлалын салбарын эдийн засгийн үр өгөөж шууд хамаарна.

Нийтэлсэн огноо2026-09-03