Мэдээ мэдээлэл

Гурван улсыг холбосон туршилтын транзит тээвэр Улаанбаатарыг дайран өнгөрөв www.bloombergtv.mn

Зүүн Ази, Европыг холбосон автозамын туршилтын транзит тээвэрлэлт өнгөрсөн ням гарагт Улаанбаатарыг дайран өнгөрлөө. Тяньжин боомт, Улаанбаатар, Улаан-Үд чиглэлийн туршилтын ачаа тээвэрлэлтийг наймдугаар сарын 13-25-нд зохион байгуулж байгаа юм. Туршилтын тээвэрлэлтийн үеэр замын нөхцөл байдал, үйлчилгээний газар, автомашины засвар, бензин шатахуун түгээх газрын байршил зэргийг нэг бүрчлэн тогтоож байгаа юм. Өнгөрсөн зургадугаар сард болсон Шанхайн Хамтын Ажиллагааны Байгууллагын уулзалтын үеэр Монгол, ОХУ, БНХАУ-ын хооронд Эдийн засгийн коридор байгуулах хөтөлбөрт гурван улсын Төрийн тэргүүн нар гарын үсэг зурсан юм. Энэ хүрээнд "Азийн авто замын сүлжээгээр олон улсын авто тээвэр гүйцэтгэх тухай" Монгол, ОХУ, БНХАУ-ын Засгийн газар хоорондын хэлэлцээр байгуулах ажлын хүрээнд энэхүү туршилтын ачаа тээвэрлэлтийг хийж байгаа юм. Монгол болон ОХУ нь олон улсын Тээврийн конвенцид нэгдсэн учраас транзит тээврийн үеэр ачаа тээврийг хил, гаалиараа шуурхай нэвтрүүлэх үүрэг хүлээсэн юм. Харин БНХАУ-ын хувьд энэхүү баримт бичигт нэгдэхээр хүлээгдэж байна.

Ази, Европын хоорондын чингэлэг тээврийн 90 гаруй хувийг далайн тээврээр 45 хоног, төмөр замаар 10 хоног тээвэрлэдэг бол авто замаар тээвэрлэлт хийхэд долоон өдөр шаардагддаг талаар Авто тээврийн үндэсний төвөөс мэдээллээ. Харин Зүүн Ази, Европыг холбосон хуурай газрын тээврийн дөрвөн гол зам байдгаас хамгийн дөт нь Монгол Улсаар дайран өнгөрч байгаа юм. Монгол Улсын хувьд энэхүү тээврийг хөгжүүлснээр экспортын бүтээгдэхүүнээ БНХАУ-аас гадна БНСУ, ОХУ, Казахстанд нийлүүлэх боломж бүрдэнэ. Мөн Монгол Улсаар дайран өнгөрч байгаа БНХАУ, ОХУ-ын хоорондох худалдааны тээврээс ашиг хүртэх юм.

Нийтэлсэн огноо2016-08-22

Категори

Үйл явдал

Гурван улсыг холбосон туршилтын транзит тээвэр Улаанбаатарыг дайран өнгөрөв www.bloombergtv.mn

Үйл Явдал

Мэдээ

Facebook