“Найрсаг харилцаа , иж бүрэн стратегийн түншлэлийн тухай Монгол улс, ОХУ-ын хоорондын гэрээ” хүчин төгөлдөр боллоо www.bloombergtv.mn
Монгол Улс, ОХУ-ын Гадаад харилцааны сайд нарын уулзалтаар найрсаг харилцаа, иж бүрэн стратегийн түншлэлийн тухай гэрээний батламж жуух бичгийг солилцсоноор энэхүү гэрээ даваа гарагаас эхлэн хүчин төгөлдөр боллоо.
Хугацаагүй байгуулсан дээрх гэрээ нь бүхий л салбарт эрх тэгш, харилцан ашигтай хамтын ажиллагааг урт удаан хугацаанд хөгжүүлэх эрх зүйн үндсийг бэхжүүлж байгаагаараа онцлог аж. Ирэх онд хоёр орны хооронд дипломат харилцаа тогтоосны 100 жилийн ой тохионо. Энэ хүрээнд хоёр талаасаа өндөр, дээд түвшний айлчлал хэрэгжүүлэх талаар Гадаад харилцааны сайд Н.Энхтайван ОХУ-д айлчлах үедээ ярилцаж, тодорхой ойлголцолд хүрчээ.
Түүнчлэн “Улаанбаатар төмөр зам” Хувь нийлүүлсэн нийгэмлэгийн үйл ажиллагааг эрчимжүүлэх, төмөр замын суурь бүтэц болон суурь бүрэлдэхүүнийг шинэчлэлд шаардлагатай хөрөнгө оруулалтыг ойрын хугацаанд шийдвэрлэхээр боллоо. Мөн гурван улсын эдийн засгийн коридор байгуулах хөтөлбөрийн хэрэгжилтийг урагшлуулах, “Сибирийн хүч-2” төслийн техник, эдийн засгийн үндэслэлийг боловсруулах ажлыг түргэсгэхэд санал нэгджээ.
Нийтэлсэн огноо2020-09-22
