“Газпром” Монголд байгалийн хий дамжуулах хоолойн төсөл хэрэгжүүлэх компани байгууллаа www.eagle.mn
ОХУ-ын “Газпром” компани Монголоор дамжин өнгөрөх байгалийн хийн хоолойн Техник, эдийн Засгийн үндэслэлийг энэ оны эхний улиралд багтаан дуусгахаар төлөвлөж байна. Энэхүү ажлыг хариуцан гүйцэтгэх “Газопровод Союз Восток” компанийг Монгол Улсад үүсгэн байгуулж, бүртгүүлжээ.
“Газопровод Союз Восток” компани нь “Сибирийн хүч 2” байгалийн хийн хоолойг Монголын газар нутгаар дайруулж тавихтай холбоотой асуудлуудыг эрхлэн явуулах юм. Энэхүү шинэ хоолой нь хүчин чадлын хувьд “Сибирийн хүч 1”-ээс 1.3 дахин хүчин чадалтай байх талаар “Газпром”-ын Ерөнхий захирал Алексей Миллер мэдэгдэл хийжээ.
“Газпром” компани Монголын Засгийн газартай байгалийн хийн хоолойг Монголоор дамжуулан тавих санамж бичгийг 2019 оны арванхоёрдугаар сард, Хөрөнгө оруулалтын өмнөх шатны үнэлгээ хийх санамж бичгийг 2020 оны наймдугаар сард тус, тус байгуулсан. Монголын нутгаар тавигдах хийн хоолой нь жилд 50 тэрбум шоо метр байгалийн хий дамжуулах хүчин чадалтай байна хэмээн тооцож байгаа юм.
"Газпром" ОХУ-БНХАУ-ыг холбох байгалийн хийн хоолойн хоёр төсөл хэрэгжүүлж буй. Энэ хоёр төслийн маршрут нь эхэндээ хоёулаа Монголыг тойроод явчихсан байсан. Баруун маршрут нь Чаяндины орд газраас эх авч, Сковородино, Благовещенскээр дамжин БНХАУ руу гарах “Сила Сибири” буюу “Сибирийн хүч”.
Хоёр дахь нь “Алтай” буюу “Сила Сибири 2”. В.Путин 2006 онд Бээжинд айлчлах үеэр анх хөндөгдөж, улмаар ажил хэрэг болсон, одоо маршрутыг нь манайхаар дайруулж өөрчлөхөөр болсон тэр төсөл юм. Хуучин маршрут нь “Заполярное” ордоос гарсан байгалийн хийн хоолойноос “Новый Уренгой” орчмоор салаалж, улмаар Нижневартовск, Томск, Новосибирск, Барнаулаар дамжин БНХАУ руу орохоор төлөвлөж байв.
Нийтэлсэн огноо2021-01-24