Мэдээ мэдээлэл

ҮСХ: VIII сард хэрэглээний үнийн индекс өмнөх оны мөн үеэс 8.9 хувиар өссөн www.bloombergtv.mn

Наймдугаар сард хэрэглээний үнийн индекс өмнөх оны мөн үеэс 8.9 хувиар өссөнийг Үндэсний статистикийн хороо мэдээллээ. Энэ нь 2019 оны есдүгээр сараас хойших хамгийн огцом өсөлт болж байна.

Харин Улаанбаатар хотын хэмжээнд 9.1 хувиар өсжээ. Инфляц улсын хэмжээнд 8.9 хувьтай гарахад 3.7 нэгж буюу 42 хувийг нь хүнсний бүлгийн үнийн өсөлт бүрдүүлсэн байна. Харин 23.3 хувийг тээврийн бүлэг эзэлжээ. Нөгөө талаас импортын барааны үнийн өсөлтөөс 50 орчим хувь нь шалтгаалсан байна.

Инфляцын түвшин өнгөрсөн оны I улирлаас эхлэн буурч, энэ оны I улирал хүртэл нам дор түвшинд буюу 2-3 хувийн түвшинд хэлбэлзэж байсан юм. Хэдий тийм боловч эдийн засаг сэргэхтэй зэрэгцэн оны II улирлаас инфляцын түвшин эрчимжээд байна. Хөл хориог сулруулж, эрэлт нэмэгдсэн ч дийлэнх хэсэг нь нэг удаагийн шинжтэй нийлүүлэлтийн хүчин зүйлсээс шалтгаалж байгааг Монголбанк мэдээлж байв.

Мөн олон улсын зах зээлд газрын тосны үнийн өсөлтийг даган шатахууны үнэ өссөн нь инфляцад дарамт болж байна. Гадаад орчны нөлөөллийг харвал нийлүүлэлтийн сүлжээнд гацалт үүсэж, тээвэрлэлтийн зардал өндөр байгаа нь импортын барааны үнэ өсөх шалтгаан болж байгаа аж. Үүний улмаас дэлхий даяар инфляцын түвшин нэмэгдээд байна. Наймдугаар сард Евро бүсийн инфляц гурван хувьтай гараад байна. Энэ нь 2011 оноос хойших дээд түвшин боллоо.

Харин ОХУ-д 6.7 хувь болсон нь сүүлийн таван жилийн дээд түвшинд тооцогдож байгаа юм. Цаашид нийлүүлэлтийн шалтгаантай үнийн огцом хэлбэлзэл үүсэхгүй бол энэ онд инфляц Төв банкны зорилтот түвшний интервалд (6%±2%) хадгалагдах хүлээлттэй гэж Монголбанк тооцоолж байсан юм.

Нийтэлсэн огноо2021-09-15

Категори

Үйл явдал

ҮСХ: VIII сард хэрэглээний үнийн индекс өмнөх оны мөн үеэс 8.9 хувиар өссөн www.bloombergtv.mn

Үйл Явдал

Мэдээ

Facebook