Монгол Улсын 2022 оны хөрөнгө оруулалтын орчны мэдэгдэлд дурдсанаар Төрийн өмчит үйлдвэрийн газрууд хувийн хэвшлийн буюу илүү үр ашигтай хөрөнгө оруулалтыг зах зээлээс шахан гаргах хүндрэл байгааг хөрөнгө оруулагчид мэдээлсэн байна. Ялангуяа зохицуулалтын тогтолцоо тодорхой бус учраас өрсөлдөөн нь хязгаарлагдмал гэж дүгнэжээ.
Түүнчлэн Эдийн Засгийн Хамтын Ажиллагаа, Хөгжлийн Байгууллагын Төрийн өмчийн үйлдвэрийн газруудад зориулсан компанийн засаглалын тухай удирдамжийг дагаж мөрддөггүй. Зөвхөн олон улсын хөрөнгө оруулалт, санхүүжилт хайх үедээ мөрдөх хандлагатай байдгийг мэдээлсэн юм.
Харин гадаадын хөрөнгө оруулалттай компаниуд олон улсын дүрэм журмыг дагаж мөрддөг. Тиймээс компанийн засаглал, ил тод байдал, цөөн хувьцаа эзэмшигчдийн эрх, санхүү зэрэг асуудал дээр зөрчилддөг байна.
Үүнээс гадна Засгийн газар Монголын Хөрөнгийн бирж, МИАТ ТӨХК, Монгол шуудан, “Таван толгой” нүүрсний уурхай зэрэг Төрийн өмчийн хөрөнгийг хувьцаа, үнэт цаас борлуулах замаар хувьчлах ажлыг олон жил төлөвлөж байгаа аж. Хэдий тийм боловч хэзээ, хэрхэн хийхээ одоо болтол тогтоогүй байгаа зэрэг асуудлыг тодотгож байна.

Нийтэлсэн огноо2022-08-04