Олон улсын тээврийн форумын SIPA хөтөлбөрийн Монгол Улсыг хариуцсан төслийн баг “Улаанбаатар хотын зорчигч тээврийн хүлэмжийн хийн ялгарлыг бууруулах арга замыг тодорхойлох нь” төслийн үр дүнг танилцууллаа.
Төслийн хүрээнд үндэсний замын судалгаа хийж, Улаанбаатар хотын зорчигч тээврийн нөхцөл байдлыг тодорхойлсон байна. Түүнчлэн нийтийн тээврийн хүлэмжийн хийн ялгарлыг бууруулах арга зам, нүүрстөрөгч багатай тээврийн төрлүүдийн туршлага солилцох чиглэлд ажиллажээ. Судалгаагаар одоо байгаа суурь үзүүлэлтээс харахад хүлэмжийн хийн ялгарлын хэмжээ 50 хувь нэмэгдэнэ. Харин зөв бодлого хэрэгжүүлбэл 2015 оны түвшнээс 40 хувь хүртэл багасгах боломжтой гэж гаржээ. Түүнчлэн нийслэлд өнөөгийн тогтсон загвараа хэрэглэсээр байх нь утааны ялгарлыг харьцангуй багасгах үр дүнтэй ч 2050 онд тавьсан утааны зорилтодоо хүрч чадахгүй гэж дүгнэсэн байна.

Зам, тээврийн хөгжлийн яамны Төрийн нарийн бичгийн дарга С.Батболд “Нүүрсхүчлийн хийг эрчим хүч болон тээврийн салбар хамгийн их ялгаруулж байна. Зам, тээврийн хөгжлийн яамны хийсэн судалгаагаар 22 орчим хувийн нүүрс хүчлийн хийг тээврийн салбар гаргаж байна гэх дүгнэлт гарсан. Иймд нүүрс хүчлийн хийг бууруулах нь чухал болоод байна.

Бодлогын хувьд томоохон шийдвэрүүд гаргасан. Жишээлбэл, байгалийн хийн цахилгаанаар ажилладаг, байгаль орчинд ээлтэй, экологийн шаардлагуудыг хангасан хөдөлгүүртэй тээврийн хэрэгслийг импортлоход гааль, нэмэгдсэн өртөгийн албан татвараас бүрэн чөлөөлсөн.

Мөн бид Дугуйт тээврийн хэрэгсэл, түүнд тавигдах ерөнхий шаардлага конценцод нэгдэн орж байгаа. Энэ конвенцод нэгдэж орсноор Монгол Улсад машин үйлдвэрлэвэл ямар шаардлага хангасан байх вэ, импортоор орж ирж буй тээврийн хэрэгсэлд ямар шаардлага тавих вэ гэдэг нь Олон Улсад хүлээн зөвшөөрөгдөж эхэлнэ гэсэн үг. Өөрөөр хэлбэл, хөдөлгөөний аюулгүй байдал, экологид талдаа маш өндөр шаардлага тавьж байгаа.

Энэхүү төслийн цаашид үргэлжилнэ. Төслөөс гарсан зөвлөмжүүдийг салбартаа хэрэгжүүлж, тээврийн салбар дахь хүлэмжийн хийг бууруулна” гэв.

Хэлэлцүүлгийн үеэр ОУТФ-ын Ерөнхий нарийн бичгийн дарга Ён Тэ Ким гадаад орнууд хүлэмжийн хийн ялгарлыг багасгахад ямар бэрхшээл тулгарч байгаа талаар хэлсэн юм. Тэрээр “Монголчуудын хүн амын 50-иас илүү хувь нь Улаанбаатар хотод төвлөрч амьдардаг тул эхний ээлжинд төвлөрлийг сааруулах шаардлагатай. Дараагийн асуудал нь энэ салбарын санхүүжилт бага байгаа бөгөөд санхүүжилтийг нь нэмэгдүүлэх хэрэгтэй байна. Түүнчлэн Засгийн газраас олон улсын нийгэмлэгүүдтэй хамтран ажилладаг ч зорилгоо тодорхойлохын тулд Улаанбаатар хоттой хамтран хот төлөвлөлтдөө анхаарах хэрэгтэй байна. Дараа нь бодит амьдрал дээр хэрэгжүүлэх нь зүйтэй" гэв. Тэр мөн дээд албан тушаалтнууд бүгд нэгдсэн саналд хүрч, тууштай хэрэгжүүлэхгүй бол хэрэгжилт хангалтгүй болох талаар онцолсон юм.

Ташрамд дурьдахад, Улаанбаатар хотод Парисын хэлэлцээрийн хүрээнд 2030 онд гэхэд тээврийн хэрэгслээс үүдэлтэй хүлэмжийн хийн ялгарал 22.7 хувь бууруулах амлалт авсан. Иймд 2021 онд 50 гаруй цахилгаан автобус, 2022-2023 онд сүүлийн үеийн 80 автобус оруулж иржээ. Ирэх онд энэ тоог 800 болгохоор зорьж байгаа. Ингэснээр нийтийн тээврийн хүлэмжийн хийн ялгарал харьцангуй багасах боломжтой аж.

Нийтэлсэн огноо2023-03-23