Япон Улсын Хаката боомтод түр саатсан аяллын хөлөг онгоцноос хууль бусаар буусан хоёр монгол залууг баривчилжээ.
Тодруулбал, Өнгөрсөн хоёрдугаар сарын 10-нд БНХАУ-ын Тяньжин хотоос гарсан аяллын хөлөг онгоцонд зорчиж явсан Монгол Улсын иргэн 36 настай А.А, 28 настай А.С нар хууль бусаар Японы Хаката боомтод усан онгоцноос олс ашиглан бууж, зугтсан байна. Ингэхдээ хоёр залуу паспортоо хөлөг онгоцонд орхисон бөгөөд боомтын ажилтанууд тэднийг онгоцноос бууж байгууламжийн хашаан дээгүүр давж, зугтахыг харснаар цагдаагийн газарт мэдээлжээ.
Харин үүнээс дөрвөн сар гаруйн дараа буюу өчигдөр /2025.06.24/ усан онгоцноос зөвшөөрөлгүй буусан хоёр монгол залуу Фүкүокагийн Цагаачлалын товчоонд хандаж, баривчлагдсан байна.
Тэднийг Цагаачлалын хяналтын тухай хууль зөрчсөн гэх үндэслэлээр буруутгаад байгаа аж. Баригдах үедээ хоёр залуугын нэг нь биедээ 180 мянга орчим иен авч явжээ. Тэд цагдаад Японд үзвэр үзэхээр ирсэн гэж мэдэгдсэн бөгөөд одоогоор цагдаа нар тэдний сэдлийг шалгаж байна.
Эх сурвалж: news.yahoo

Нийтэлсэн огноо2025-06-26