Монгол Улсын Ерөнхийлөгч Ухнаагийн Хүрэлсүх Бүгд Найрамдах Киргиз улсын Ерөнхийлөгч Садыр Жапаровын урилгаар тус улсад төрийн айлчлал хийж байна. Энэ удаагийн айлчлалаар талууд Иж бүрэн түншлэлийн харилцаа тогтоох тухай хамтарсан тунхаглалд гарын үзэг зурах хүлээлттэй байна.
Монгол Улсын Ерөнхийлөгчийн айлчлалын хүрээнд хоёр улс хүнс, хөдөө аж ахуй, аялал жуулчлал, хууль эрхзүй зэрэг чухал салбаруудад хамтран ажиллах санамж бичиг болон хэлэлцээр байгуулахаар төлөвлөж байна. Тухайлбал, хууль эрхзүйн салбарын хамтын ажиллагааны хүрээнд Монгол Улс Киргиз улстай гэмт этгээд шилжүүлэх тухай хэлэлцээр байгуулах юм. Мөн хоёр улс жолооны эрхийн үнэмлэхийг харилцан хүлээн зөвшөөрөл хэлэлцээр байгуулахаар төлөвлөж байгааг албаныхан мэдээллээ.   
Энэ удаагийн Монгол Улсын ерөнхийлөгчийн айлчлал нь хоёр улсын найрсаг харилцааг өргөжүүлэн хөгжүүлж, хамтын ажиллагааг эдийн засгийн агуулгаар баяжуулж, бизнес, эдийн засаг, худалдаа, хөрөнгө оруулалтын хамтын ажиллагааг өргөжүүлэхэд чухал ач холбогдолтой гэж судлаачид хэлж байна. 
Төв Азийн бүс нутагт оршдог Монгол, Киргиз улсууд нь байгаль цаг уур, соёл, зан заншил гээд олон талаар ойролцоо. Тиймээс хоёр улсын соёлын салбарын хамтын ажиллагааг ч өргөжүүлэн хөгжүүлэхээр төлөвлөж байна.    
Хоёр улс 1992 онд дипломат харилцаа тогтоосон. Найрсаг харилцаа, хамтын ажиллагааны олон жилийн түүхтэй. 2019 онд Монгол Улсаас Киргиз улсад суух элчин сайдын яамыг Бишкек хотноо нээсэн бол 2023 оны наймдугаар сард Киргиз улсаас манай улсад суух элчин сайдын яамыг Улаанбаатар хотод байгуулсан юм.

Нийтэлсэн огноо2025-07-21