Цагалварын дагуу өдийд ирэх оны төсвийн хоёрдугаар хэлэлцүүлэг дуусаж, боогдох шатандаа явж байх байсан. Харамсалтай нь, эрх баригч МАН-ын даргын сандал суудлын хэрүүл нь төрийн зовлон болж, өнөөдөр төрийн бүх шатанд ажил гацжээ. Зарласан зарим тендер зогсож, тендерт шалгарсных нь төлөвлөгөөт санхүүжилт гацсан байна. Үндсэндээ төрийн худалдан авалтын ажил хүлээлтийн, зогсонги байдалд шилжжээ.
УИХ арваннэгдүгээр сары 15-ны дотор ирэх оны төсвийг батлах хуулийн хугацаатай. Өнөөгийн улс төрийн нөхцөл байдлыг харвал, 2026 оны төсвийн хуулийг хугацаандаа амжиж баталлаа гэхэд маш богино хугацаанд, бараг л хэлэлцүүлж амжихгүйгээр баталж таарна. Хэрвээ хуульд заасан хугацаанд төсвөө баталж чадахгүй бол УИХ тарах, цаашлаад Монгол Улс дотоод улс төрийн нөхцөл байдлаас болж нийгэм, эдийн засгийн хямрал үүсэх бодит эрсдэл рүү орно.
Улсын төсөв батлагдсаны дараа нийслэл, аймгууд төсвөө баталдаг. Тэгэхээр улсын төсөв батлах процесс удаашрах нь нийслэл, орон нутгийн төсвийн хэлэлцүүлгийг гацааж байна. Түүнчлэн улс төрийн тогтворгүй байдлаас шалтгаалж 2025 оны төсвийн гүйцэтгэл, төлөвлөгөөт санхүүжилтүүд саатах зэрэг тодорхой байдал нэмэгдэж байгаа нь дотоод, гадаадын аж ахуйн нэгж байгууллагуудад ихээхэн хүндрэл үүсгэж эхэлж байгааг эх сурвалжууд хэлж байна.
Гадаад талд нөхцөл байдал эвгүйтэж, Хятад-Америкийн худалдаан ширүүсэх төлөвтэй байгаа энэ үед Монгол Улс дотоод улс төрийн зодооноос үүдэж эдийн засгаа элгээр нь хэвтүүлэх эрсдэлд оржээ.
By
Сэтгүүлч Г.Батжаргал нь iToim.mn сайтад 2015 оноос ажиллаж байна. Улс төр, нийгэм, эдийн засгийн чиглэлээр мэдээ, мэдээлэл бэлтгэдэг.

Нийтэлсэн огноо2025-10-13