“Эс Системс” ХХК (Шунхлай групп), “Саммит Компьютер Технологи” ХХК, “Dell Technologies”, “Huawei Technologies” болон “CIO Club Mongolia” байгууллагууд хамтран Монгол Улсад хиймэл оюун ухааныг хөгжүүлэх, дараагийн түвшний дэд бүтцийн хөгжлийг түргэтгэх зорилготойгоор “AI Ready – Data Center Summit Mongolia” арга хэмжээг Aurug Place-д 2025 оны арваннэгдүгээр сарын 6-ны өдөр амжилттай зохион байгууллаа.
Аливаа технологийн суурь болсон дэд бүтцийн бэлэн байдал, түүнд хэрхэн бэлдэх, тулгамдаж буй асуудлуудыг хэлэлцэх, мэдээлэл солилцох нь нэн чухал байдаг.
Энэ ч утгаараа тус арга хэмжээ нь салбарын шийдвэр гаргах түвшний удирдлагууд, шилдэг  мэргэжилтнүүд хиймэл оюун ухааны хөгжилд шаардагдах үндсэн суурь дэд бүтцийг хамтдаа судлах, хэлэлцэх, санал бодлоо солилцох зорилготой зохион байгуулагдсан бөгөөд дэд бүтцийг хэрхэн дараагийн түвшинд хөгжүүлэн, улс орны ирээдүйн бүтээн байгуулалт, хөгжилд өөрсдийн хувь нэмрээ оруулах зэргийг салбарын мэргэжилтнүүдтэй хэлэлцсэн чухал ач холбогдолтой арга хэмжээ болж өнгөрлөө.
“Эс Системс” ХХК нь “Шунхлай” группийн технологийн нүүр царай болон сүүлийн 3 жилд Дата төвийн салбарт бүх төрлийн үйлчилгээ үзүүлэхийн зэрэгцээ кибер аюулгүй байдал, технологийн аутсорсинг, мэргэжлийн зөвлөх үйлчилгээг дэлхийн шилдэг компаниудтай хамтран технологийн бүхий л шийдлийг боловсруулж, туршлагад суурилсан технологийн үйлчилгээг тогтвортой дэд бүтцэд тулгуурлан хүргэж буй мэргэжлийн экспертүүдээс бүрдсэн баг хамт олон юм.
“Саммит Компьютер Технологи” компани нь компьютер, тоног төхөөрөмжөөс эхлүүлээд сүлжээ, сервер, сторэйж, автоматжуулалт, кибер аюулгүй байдал болон дата төв хүртэлх дэлхийд тэргүүлэх мэдээллийн технологийн цогц шийдлүүдийг Монгол Улсад албан ёсоор нэвтрүүлэгч, салбартаа тэргүүлэх мэргэжлийн байгууллага юм.
“Huawei” компани нь 1987 онд үүсгэн байгуулагдсан бөгөөд Мэдээлэл, Харилцаа холбооны технологи (ICT) дэд бүтэц, ухаалаг төхөөрөмж нийлүүлдэг дэлхийн тэргүүлэгч компаниудын нэг юм. Мэдээллийн технологийн захирлуудын клуб нь 2015 онд байгуулагдсан бөгөөд технологийн шинэлэг мэдээ, мэдээлэл, бүтээгдэхүүнтэй танилцах, гишүүддээ үйлчлэх, мэдээллийн аюулгүй байдал, дижитал шилжилт зэрэг мэдээллийн технологийн бүхий л салбарын цар хүрээг хамран үйл ажиллагаа явуулдаг төрийн бус байгууллага юм.

Нийтэлсэн огноо2025-11-10