Японы Токио хотод болсон жүдо бөхийн “Их дуулга” тэмцээнд оролцсоны дараа Монголын баг хамтарсан бэлтгэлд хамрагджээ. Энэ үеэр тус улсын жүдогийн холбооны удирдлагууд Монголын жүдо бөхийн холбооныхонтой албан ёсны уулзалт хийж, хоёр талын хамтын ажиллагааг өргөжүүлэх шийдвэр гаргасан байна. Энэ хүрээнд “Judo for Tomorrow” төслийг Монгол Улсад дахин хэрэгжүүлэхээр болжээ. Уг төсөл нь Монголын жүдо бөхийн хөгжлийг дэмжих, ялангуяа хүүхэд, өсвөрийн жүдогийн дасгалжуулагч нарыг чадавхжуулахад чиглэх аж. Төслийн хүрээнд 2026 оны хоёрдугаар сарын 1-10-нд Японы мэргэжлийн дөрвөн дасгалжуулагч Улаанбаатар хотод ажиллаж, орон нутгийн жүдогийн багш, дасгалжуулагч нарт зориулсан сургалтыг зохион байгуулахаар болжээ. Түүнчлэн “Кодокан институт төв”-тэй хамтран ажиллах бөгөөд энэ хүрээнд өсвөрийн 10-15 дасгалжуулагчийг мэргэшүүлэх сургалтад үнэ төлбөргүй хамруулах болсон байна.
Дээр дурдсан хамтын ажиллагаа нь Монголын жүдо бөхийн хүүхэд, өсвөр үеийн сургалтын чанарыг дээшлүүлэх, багш, дасгалжуулагчдын мэргэжлийн ур чадварыг олон улсын түвшинд ойртуулах чухал алхам болно гэдгийг талууд онцоллоо.
Ташрамд дурдахад, “Их дуулга”-ын дараа манай шигшээ багийнхан “Кодокан институт төв”-д тав хоногийн турш олон улсын хамтарсан бэлтгэлд оролцоод эх орондоо ирж байна.

Нийтэлсэн огноо2025-12-17