АНУ-ын Ерөнхийлөгч Дональд Трамп Швейцарын Давос хотноо “Энхийн Зөвлөл”-өө албан ёсоор байгууллаа.
Гарын үсэг зурах ёслолд цөөн хэдэн улсын төрийн тэргүүн, төлөөлөгчид оролцсоны дотор Монгол Улсын Ерөнхий сайд Г.Занданшатар багтаж, Монгол Улс тус зөвлөлд нэгдэж буйгаа илэрхийлж гарын үсэг зурж баталгаажуулсан. Тэгвэл уг асуудлаар судлаач, түүхийн ухааны доктор Р.Болд байр сууриа илэрхийллээ.
Тэрээр “Гадаад бодлогын бие даасан байдлыг хангаж, тэнцвэр тогтоосон, цагаа олсон, зоригтой алхам хийсэн Ерөнхий сайд Г.Занданшатарт баяр хүргэмээр байна. Энхийн төлөө зөвлөл нь АНУ-ын санаачилгаар НҮБ-ын Аюулгүйн зөвлөлөөс 2025 оны сүүлчээр баталсан 2803 тоот тогтоолыг хэрэгжүүлэхэд чиглэсэн, зорилгоо дайн мөргөлдөөнийг энхийн аргаар шийдвэрлэх, хуулийн засаглалыг бэхжүүлэхэд дөхөм үзүүлэх байгууллага болох учиртай. Эхний том зорилго нь Газын зурвасын бүтээн байгуулалт, тогтвортой байдлыг хангах явдал. Энэ зорилгоо хангасаны дараа өөр бүс нутагт үйл ажиллагаагаа шилжүүлж болно. Энэ бол НҮБ-ыг орлох биш харин үйл ажиллагааг нь суларсан цэгт нь нөхөж тус дөхөм үзүүлэх ач холбогдолтой. АНУ нь олон улсын олон байгууллагын гишүүнчлэлээс татгалзсанаа бас нөхөж буй үйлдэл биз. Газын зурвасын асуудал бол нэг жижиг улс өөрийгөө хамгаалсан, нөгөө нэг жижиг үндэстэн амьд үлдэхийн төлөө болсон явдал. Энэ гашуун сургамжийг бид тооцсон биз. Дээр нь энэ бол идэвхтэй бодлогын илрэл. Хэний ч эсрэг чиглээгүй, ийм алхам хийхэд хэнээс ч асуух шаардлагагүй, манай ашиг сонирхолд нийцсэн, ямар нэгэн татвар татаас төлөх шаардлагагүй, гурван жил болоод гарч ч болох асуудал. ЭТЗ нь шинэ бүтэц, олон зүйл нь тодорхойгүй буй. Энэхүү бүтцэд Азийн 5-6 улсыг нэгдэхийг тэдгээрийн дотор манай хөршүүд ч уригдсан, нээлттэй. ОХУ өрнөдөд царцаагдсан нэг тэрбум ам. долларыг Газын бүтээн байгуулалтад шилжүүлэх гэдэг нөхцөл тавьсан. Лалын сүсэгтнүүд олонтой манай хөршүүд яваандаа нэгдэх биз. Монгол Улс тус байгууллагад ямар үүрэг гүйцэтгэх нь бидний идэвхтэй алхамаас л шалтгаална. Нэн тэргүүнд олон улсын зуучлалын гүүрний нэг багана болох, эвийг нь олж оролцвол гуравдагч түншүүдээс хөрөнгө оруулалтыг татах нөхцлийг ч бий болгож болно гэлээ.
Эх сурвалж: Зууны мэдээ

Нийтэлсэн огноо2026-01-26