“Эрдэнэс Монгол” ХХК-ийн гүйцэтгэх захирал Б.Даваадалай сэтгүүлчидтэй уулзаж компанийн үйл ажиллагааны талаар өчигдөр танилцуулав.
"Эрдэнэс Монгол" ХХК өнгөрсөн онд 816 тэрбум орлоготой ажиллаж, 274 тэрбум төгрөгийг улсын төсөвт төвлөрүүлсэн байна. Мөн тус онд 194.6 тэрбум төгрөгийг өр барагдуулжээ. Тодруулбал Багануур ХК болон Шивээ Овоо ХК-ийн Сангийн яамнаас авсан дамжуулах зээлийн төлбөрт нийт 110.2 тэрбум төгрөг, Багануур ХК болон Шивээ Овоо ХК-ийн татварын хуримтлагдан нийт өрд 84 тэрбум төгрөг төлсөн байна. Харин энэ онд 757.1 тэрбум төгрөгийн орлого олохоор төлөвлөж буй аж.
Тус компани энэ онд стратегийн ордын төрийн эзэмшлийн хувь хэмжээг тогтоож, томоохон төсөл хөтөлбөрийг эрэмбэлж эрчимжүүлэхэд анхаарлаа хандуулан ажиллаж байгаа аж. Ингэхдээ стратегийн орд газарт хамаарах төсөлд гаднаас хөрөнгө оруулалт татаж, эдийн засгийн эргэлтэд оруулна. Бортээгийн ордыг ил тод, өрсөлдөөнт загвараар эдийн засгийн эргэлтэд оруулах ажлыг эхлүүлсэн. Цаашид гангийн үйлдвэр, зэсийн баяжмал хайлуулах үйлдвэр, нүүрс пиролизын үйлдвэр болон алтны төслүүдийг эргэлтэд оруулахаар төлөвлөж байна. 
Мөн “Эрдэнэс Тавантолгой” ХК-д олон улсын аудит оруулж, 2027 онд 10-20 хувийг хөрөнгийн биржээр арилжаалах боломжийг судалж байна. Мөн тус компанийн ногдол ашгийн өглөг, авлагыг цэгцэлж 1072 хувьцааг өвлүүлдэг болгох аж.
Төрийн албаны нүсэр бүтцийг цөөлж тооноос чанарт шилжих бодлогын хүрээнд тус компани чиг үүргийн давхардалтай байсан зөвлөл, групп, менежерийн бүтцийг татан буулгаж, удирдах албан тушаалтны орон тоог 32 хувиар, нийт орон тоог 10 хувиар цөөлжээ. Цаашид харьяа бүрэлдэхүүн компаниуддаа ч энэхүү ажлыг хийхээр төлөвлөсөн байна.

Нийтэлсэн огноо2026-04-03