Монгол Улсын Засгийн газрын шийдвэрээр “Монгол хүн баялгийнхаа эзэн” зөвлөлдөх санал асуулгыг зохион байгуулж байна. Уг санал асуулгын эхний шат 03-р сарын 27-нд орон даяар эхэлсэн. Эхний шатанд Үндэсний статистикийн хорооноос боловсруулсан санамсаргүй түүврийн аргаар 1570 иргэнийг сонгож санал асуулга авч байгаа юм. Дөрөвдүгээр сарын 01-ний байдлаар сонгогдсон иргэдийн 78 хувь нь хамрагдаад байна. Санал асуулгын хоёр дахь шат буюу Зөвлөлдөх уулзалтыг дөрөвдүгээр сарын 11,12-ны өдрүүдэд Төрийн ордонд зохион байгуулна. Энэхүү уулзалтад нэг дэх шатнаас сонгогдсон 785 иргэн оролцож, танхимын хэлэлцүүлэг зохион байгуулж, илүү нарийвчилсан зөвлөмж, санал дүгнэлт гаргана.
УИХ Зөвлөлдөх санал асуулгын тухай хуулийг 2017 онд баталсан. Шууд ардчиллыг хэрэгжүүлэх аргуудын нэг болох зөвлөлдөх ардчиллын зарчмуудыг энэ хуульд тусган, зөвлөлдөх санал асуулгыг хоёр үе шаттай зохион байгуулдаг байхаар зохицуулсан. Уг хуулийн дагуу анхны санал асуулгыг 2017 онд “Үндсэн хуулийн нэмэлт, өөрчлөлт ба зөвлөлдөх ардчилал” сэдвийн хүрээнд зохион байгуулж, Үндсэн хуульд оруулах өөрчлөлтийн суурь саналуудыг боловсруулсан юм. Үүний дараа 2019 онд болсон зөвлөлдөх санал асуулгаар нийгэм, эдийн засгийн тулгамдсан асуудлыг тодорхойлон, шийдвэрлэх арга замыг хэлэлцэж, шинэтгэлийн чиглэлийг тодорхойлсон. Харин 2023 оны санал асуулгаар иргэний болон улс төрийн эрх, хариуцлага, парламентын ардчилал, эдийн засаг, баялгийн сан, төвлөрлийг сааруулах, нийгмийн тулгамдсан асуудлууд гэсэн дөрвөн багц сэдвээр иргэдтэйгээ зөвлөлдөн, зөвлөмж боловсруулж УИХ-д танилцуулж байжээ.
Өмнөх зөвлөлдөх санал асуулгуудыг УИХ-аас зохион байгуулж байсан бол энэ удаагийн санал асуулгыг анх удаа Засгийн газраас санаачлан зохион байгуулж байгаагаараа онцлог. Зөвлөлдөх санал асуулгын сэдэв “Монгол хүн баялгийнхаа эзэн”. Үндэсний баялгийн сангийн орлогын эх үүсвэрийг хэрхэн нэмэгдүүлэх, сангийн хөрөнгийг арвижуулах, зарцуулах, газрын хэвлийн баялгийн үр өгөөжийг иргэн бүрд шударгаар хүртээх, үүгээр дамжуулахн эдийн засгийн өсөлтийг айл өрх бүрд бодитоор мэдрүүлэх оновчтой шийдлийг иргэдтэйгээ зөвлөлдөн, зөвшилцөх замаар хамтдаа тодорхойлохыг зорьж байгаа юм. Зөвлөлдөх санал асуулгыг хуулийн дагуу хараат бусаар сонгогдсон Зөвлөлдөх зөвлөл удирдан зохион байгуулах бөгөөд санал асуулгаас гаргасан зөвлөмжийг Засгийн газарт албан ёсоор хүргүүлж, бодлого шийдвэрт тусгуулах юм.
Зөвлөлдөх санал асуулгын тухай хуулийн хүрээнд иргэд төрийн бодлого, шийдвэр гаргах үйл явцад шууд оролцох боломж ийнхүү бүрдэж байна.
Эх сурвалж: “Өнөөдөр” сонин

Нийтэлсэн огноо2026-04-02