“Эрдэнэс Оюу толгой” ХХК-ийн гүйцэтгэх захирлыг чөлөөлж, сонгон шалгаруулж томилохыг Засгийн газрын нэгдүгээр сарын 14-ний өдрийн хуралдааны тэмдэглэлээр “Эрдэнэс Монгол” ХХК-д үүрэг болгожээ.
Мөн “Оюу толгой” ХХК-ийн ТУЗ-д Засгийн газрын төлөөллийг хэрэгжүүлж байгаа гишүүдийн ажлыг дүгнэх, чөлөөлөх болон сонгон шалгаруулалтаар шинээр томилохыг Монгол Улсын сайд, ЗГХЭГ-ын дарга С.Бямбацогтод үүрэг болгосон талаар уг тэмдэглэлд дурджээ.
Оюу толгой төслийн зээлийн хүүг бууруулах, менежментийн төлбөрийг багасгах чиглэлээр “Рио Тинто” групптэй хийж буй хэлэлцээг өргөтгөх, Монгол Улсын эрх ашгийг хангах нэмэлт нөхцөлүүдийг хүлээн зөвшөөрүүлэхэд “Оюу толгой” ХХК-ийн ТУЗ-ийн гишүүд, “Эрдэнэс Оюу толгой” ХХК-ийн гүйцэтгэх захирал, ТУЗ-ийн гишүүд онцгой чухал үүрэг хүлээнэ гэдгийг Ерөнхий сайд Г.Занданшатар онцгойлон анхааруулсан байна.
"Эрдэнэс Оюу толгой" компанийн Гүйцэтгэх захирал Э.Ганхүүг өнгөрсөн оны арванхоёрдугаар сард Авлигатай тэмцэх газраас хойшлуулшгүй ажиллагааны хүрээнд баривчилж, албан өрөөнд нь нэгжлэг хийж байсан. Тэрээр 2024 онд тус компанийн гүйцэтгэх захирлаар томилогдсон байдаг.
Харин ТУЗ-д нь Монголын талын гурван хүн ажилладаг. Тодруулбал, ТУЗ-ийн гишүүнээр УИХ-ын гишүүн асан Н.Цэрэнбат, Э.Мэндтүвшин, Д.Цолмон нар ажиллаж байна. Д.Цолмон нь өнгөрсөн оны аравдугаар сард тус компанийн ТУЗ-ийн гишүүнээр томилогдсон бол Э.Мэндтүвшин 2024 оны арваннэгдүгээр сард томилогдож байсан. Харин ТУЗ-ийн дарга Н.Цэрэнбат 2022 оны арваннэгдүгээр сард томилогдон өнөөдрийг хүртэл ажиллаж байна.
Тэгвэл Засгийн газрын нэгдүгээр сарын 14-ний тэмдэглэлээр дээрх албан тушаалтнуудыг чөлөөлж, сонгон шалгаруулалт зарлахыг үүрэг болгожээ.
By
Сэтгүүлч М.Булган нь iToim.mn сайтад 2015 оноос ажиллаж байна. Улс төр, нийгмийн чиглэлээр мэдээ, мэдээлэл бэлтгэдэг.

Нийтэлсэн огноо2026-01-26