Засгийн газар 2026 оны эхний хагас жилд хэрэгжүүлэх буюу эдийн засгийн өсөлтийг иргэддээ хүргэх 300 хоногийн төлөвлөгөөг баталсан. Ингэхдээ яам бүр хийх ажил, хүрэх үр дүнгээ зурагласан байна. Энэ хүрээнд Аж үйлдвэр, эрдэс баялгийн яам, Монголбанктай хамтран алт тушаалтыгоны эхний хагаст 20-30 хувиар нэмэгдүүлэхээр тусгажээ.
Дэлхийн зах зээл дээр алтны үнэ унц нь 5000 ам.доллар давж, түүхэн дээд хэмжээнд хүрсэн ч Монгол Улсад алт тушаалт 2025 онд өмнөх оны мөн үеэс 20 гаруй хувиар буурсан. Олон улсын эдийн засаг, геополитикийн нөхцөл байдлаас шалтгаалж алтны үнэ цаашид урт хугацаанд өсөлтөө хадгалах таамгийг шинжээчид хийгээд буй. Тиймээс Засгийн газар, Монголбанкнаас алтны үнэ өсөж байгаа цонх үеийг ашиглан алт тушаалтаа идэвхжүүлэх замаар валютын нөөцөө зузаатгах зорилт тавьжээ.
Энэ хүрээнд дараах ажлыг 2026 оны эхний хагаст хийж хэрэгжүүлэхээр төлөвлөсөн байна. Үүнд,
Алтны ордуудыг Алт-3 аяны хүрээнд эдийн засгийн эргэлтэд оруулна;
Алтыг хууль бусаар хилээр гаргахаас сэргийлсэн арга хэмжээг авч хэрэгжүүлнэ;
Овоот хяр, Баянхөндий, Цагаан суварга, Хүрэнцавын алтны ордыг эдийн засгийн эргэлтэд оруулах бэлтгэл ажлыг хангана;
Хилийн зурваст олгогдсон алтны ашиглалтын тусгай зөвшөөрлийн талбайд бүртгэгдсэн нөөцийг олборлох ажлыг эхлүүлж, алт тушаалт нэмэгдэнэ;
Бичил уурхайгаар ашигт малтмал олборлох журмыг шинэчилж, байгаль орчинд сөрөг нөлөө үзүүлэхгүйгээр хариуцлагатай үйл ажиллагаа явуулж буй бичил уурхайн аж ахуйн нэгжүүд ажиллах эрх зүйн орчныг боловсронгуй болгоно;
Алтны төслүүдэд форвард хэлцэл хийх замаар санхүүжилтийг нэмэгдүүлнэ гэж тусгасан байна.
Түүнчлэн, 2026 оны эхний хагас жилд багтаан Алт цэвэршүүлэх үйлдвэрийн хөрөнгө оруулагч, гүйцэтгэгчийг сонгон шалгаруулж, гэрээ байгуулан бүтээн байгуулалтын ажлыг эхлүүлнэ гэж тооцжээ.  
Алт цэвэршүүлэх үйлдвэр ашиглалтад орсноор жилд 20 тн.алт, 50 тн.мөнгө болон зарим үнэт металлыг дотооддоо боловсруулж, дэлхийн стандартад нийцсэн алтан болон мөнгөн гулдмай, үрэл, ялтас зэрэг цэвэршүүлсэн бүтээгдэхүүн үйлдвэрлэх боломж бүрдэх юм байна.
By
Сэтгүүлч Г.Батжаргал нь iToim.mn сайтад 2015 оноос ажиллаж байна. Улс төр, нийгэм, эдийн засгийн чиглэлээр мэдээ, мэдээлэл бэлтгэдэг.

Нийтэлсэн огноо2026-01-27