Монголбанк 2026 оны нэгдүгээр сард нийт 1.9 тонн үнэт металл худалдан авсан нь өмнөх оны мөн үетэй харьцуулахад 50.2 хувиар өсжээ. Үнэт металлын худалдан авалт эрчимжсэн нь дотоодын олборлолт нэмэгдсэн, мөн дэлхийн зах зээл дэх алтны үнийн өсөлттэй холбоотой байна.
Тодруулбал, Дархан-Уул аймаг дахь Монголбанкны салбар 61.0 кг, харин Баянхонгор аймаг дахь Монголбанкны салбар 456.9 кг үнэт металл худалдан авчээ. Эдгээр бүс нутгууд нь алт олборлолтын идэвхтэй бүсэд тооцогддог бөгөөд орон нутгийн олборлогчид Монголбанкаар дамжуулан алтаа борлуулах нь нэмэгдэж байгаа аж.
Монголбанк үнэт металл худалдан авах үнийг дэлхийн зах зээлийн ханштай уялдуулан тогтоодог. Энэ нь олборлогчдод зах зээлийн бодит үнээр алтаа борлуулах боломжийг олгож, алтыг албан ёсны сувгаар худалдаалах нөхцөлийг бүрдүүлдэг ач холбогдолтой юм.
2026 оны нэгдүгээр сард Монголбанк алт худалдан авах дундаж үнийг 539 мянга 587.33 төгрөгөөр тогтоосон. Алтны үнэ өндөр түвшинд хадгалагдаж буй нь  үнэт металл худалдан авалтын хэмжээ өсөхөд нөлөөлсөн гол хүчин зүйлсийн нэг болж байна. Монголбанк үнэт металл худалдан авах ажиллагаагаар дамжуулан гадаад валютын улсын нөөцийг нэмэгдүүлэх, төгрөгийн тогтвортой байдлыг хангах, мөн уул уурхайн салбарын ил тод, албан ёсны эргэлтийг дэмжих бодлогыг хэрэгжүүлж байгаа аж.

Нийтэлсэн огноо2026-02-03