Гадаад улсын виз гаргана, тийз зарна гэх үйлдлийн аргуудаар залилах гэмт хэрэг үйлдэж, иргэдэд 1.8 тэрбум төгрөгийн хохирол учруулсан Н-ийг БНТУ-аас олж тогтоон баривчлаад байна. 

Тодруулбал, 2022 оноос хойш Монгол Улс интерполын Хөхбулант зар мэдээгээр олон улсад эрэн сурвалжлагдаж байсан оргодол этгээд Н-ийг Мөрдөн шалгах албаны Залилах гэмт хэрэгтэй тэмцэх газрын алба хаагчид ЦЕГ-ын Интерполын үндэсний төв товчооны ажлын алба, Эрүүгийн цагдаагийн албаны эрэн сурвалжлах хэлтэстэй хамтран илрүүлжээ. Энэ оны хоёрдугаар сарын 11-ний өдрийн 16:00 цагийн орчимд БНТУ-ын Истанбул хотын нутаг дэвсгэрээс тус улсын цагдаагийн байгууллагын ажилтнуудаар саатуулах, баривчлуулах ажлыг зохион байгуулсан байна. 

Уг этгээд нь бусдын бичиг баримтыг ашиглан Монгол Улсаас оргон зайлсан байж болзошгүй нөхцөл байдал урьдчилсан байдлаар тогтоогдсон байна. Тухайн этгээдийг Монгол Улсад шилжүүлэн авчирч, цагдан хорих таслан сэргийлэх арга хэмжээ авах, оргон зайлах үедээ холбогдсон бусад үйлдэл холбогдлууд болон Монгол Улсын хилээр хэрхэн нэвтэрсэн байдлыг тогтоох зэрэгт мөрдөн шалгах ажиллагааг явуулж байна.

Нийтэлсэн огноо2026-02-16