Төрийн хэмнэлтийн тухай хуулийн дагуу тухайн оныхоо төсөвт тавиулсан бүтээн байгуулалтын тендерийг зургаадугаар сарын 1-ээс өмнө зарлахгүй бол санхүүжилтийг буцаан татдаг. Тэгвэл энэ оны төсвийн жилийн нэгдүгээр улирал дуусах гэж байна. Өнөөдрийн байдлаар энэ онд тавигдсан хөрөнгө оруулалтын 50 хувь нь л тендер зарлах бэлтгэл ажлаа хангажээ.
2026 оны төсөвт 296 төсөл арга хэмжээ батлагдсан. Үүнээс гуравны нэг нь буюу 110-аад төсөл арга хэмжээг Төрийн худалдан авалтаар авах төлөвлөгөө гарсан бол 50 гаруй төслийн бэлтгэл ажил эцэслэж, тендер зарлах арга хэмжээ нь ирээгүй байгааг Сангийн сайд Б.Жавхлан хэлсэн. Тэрээр "Өнөөдөр гурван сарын гурван болчихлоо. Зургадугаар сарын 1 гэхэд эргүүлээд татна гэдэг хууль хэвээрээ шүү. Хууль нь өөрчлөгдөөгүй. Энэ бол төсвийн ерөнхийлөн захирагч нар, сайд нар, төрийн худалдан авах үйл ажиллагааг зохион байгуулдаг институцэд маш сайн сахилга батыг өгч байгаа хууль.Үүний нэг сайн үр дүн бол төсөв өргөн барих төлөвлөх, төсвийг батлах шатанд тухайн хөрөнгө оруулалт ямарваа нэг бэлтгэл ажил хангаагүй бол зургаадугаар сарын 1 гэхэд тендерээ зарлаж чадахгүй хэмнэлтэд ордог юм байна шүү гэдгийг маш хатуу анхааруулж байгаа. Энэхүү хуулийг ойрын хугацаанд өөрчлөх бодол байхгүй. Худалдан авах үйл ажиллагааг Төрийн худалдан авах үйл ажиллагааны газар, яамд болон орон нутаг гэсэн гурван газар хийнэ. 2026 оны нийт төсвийн хүрээнд 296 төсөл арга хэмжээ батлагдсан. Үүнээс гуравны нэг нь буюу 110-аад төсөл арга хэмжээг Төрийн худалдан авалтаар авах төлөвлөгөө гарсан. Харамсалтай нь одоогоор 50 гаруй төслийн бэлтгэж ажил эцэслэж, тендер зарлах арга хэмжээ нь ирээгүй байна. Т.Доржханд сайдын мэдэгдэж байгаагаар ер нь гурван сарын 15-наас цаашаагаа тендер зарлахад эрсдэлтэй болно. Зургаадугаар сарын 1 гэхэд амжихгүй гэдгийг хатуу анхаарууллаа. Үүн дээр Төсвийн ерөнхийлөн захирагч нар болон орон нутгуудын хариуцаж байгаа албан тушаалтнууд онцгой анхаарч ажиллах хэрэгтэй" гэсэн юм.
Цаашдаа Засгийн газрын хуралдаанд тендерээ зарласан тоо баримтуудыг танилцуулаад явах аж. Сайд, УИХ-ын гишүүд тойрогтоо хөрөнгө оруулалт тавиулах гэж хөөцөлдөж, төсөв хэлэлцэх үеэр Сангийн сайдыг тойглож гүйдэг ч санхүүжилтээ тавиулсан хойноо хуульд заасан хугацаанд тендерээ зарладаггүй. Ингээд Хэмнэлтийн тухай хуулийн дагуу санхүүжилтээ татуулдаг. Энэ жилийн хувьд ч хугацаандаа тендер зарлах нь хангалтай, дөнгөж 50 хувьтай байгааг Сангийн сайд хэлсэн.
Төрийн хэмнэлтийн хуульд:
13 дугаар зүйл.Хөрөнгө оруулалтын төсөл, арга хэмжээ
13.1.Төсвийн хөрөнгө оруулалтаар хэрэгжүүлэх төсөл, арга хэмжээний хэрэгжилтийг зохион байгуулахад дараах журмыг баримтална:
13.1.1.батлагдсан төсөл, арга хэмжээний худалдан авах ажиллагааг жил бүрийн 05 дугаар сарын 31-ний өдрийн дотор бүрэн дуусгах;
13.1.2.энэ хуулийн 13.1.1-д заасан хугацаанд худалдан авах ажиллагааг зохион байгуулж дуусгаагүй бол төсөл, арга хэмжээний санхүүжилтийг төсвийн хэмнэлтэд тооцох гэж заасан байдаг.

By
Пүрэвдагва БУЛГАН
Сэтгүүлч М.Булган нь iToim.mn сайтад 2015 оноос ажиллаж байна. Улс төр, нийгмийн чиглэлээр мэдээ, мэдээлэл бэлтгэдэг.

Нийтэлсэн огноо2026-03-11