“Улаанбаатар марафон-2026” олон улсын гүйлтийн бүртгэл үргэлжилж байна. Марафонд гүйх оролцогчид тавдугаар сарын 1-ний өдрийн 17:00 цаг хүртэл ulaanbaatar.marathon.mn цахим хуудас болон Hipay аппликэйшнаар бүртгүүлэх боломжтой. Мөн тусгай олимпын төрөлд хамаарах 500 болон 800 метрийн зайн гүйлтийн бүртгэлийг өмнөх жилүүдийн адил Монголын тусгай олимпын хороо хариуцна.

Өнөөдрийн байдлаар "Улаанбаатар марафон 2026" олон улсын гүйлтэд оролцохоор 11 мянга гаруй хүн бүртгүүлээд байна. Сүүлийн жилүүдэд гадаад, дотоодын мэргэжлийн болон сонирхогч гүйгчид олноор оролцох болсон. Энэ нь арга хэмжээний цар хүрээ тэлж, оролцогчдын тоо жил бүр нэмэгдэж байгааг харуулж байна.

“Улаанбаатар марафон” нь анх 2014 онд нийслэл хот байгуулагдсаны 375 жилийн ой, “Найрсаг Улаанбаатар” хөтөлбөрийн хүрээнд зохион байгуулагдаж байсан бол өдгөө олон улсад танигдсан нэр хүндтэй марафонуудын нэг болж өргөжсөн. Түүнчлэн олон улсын стандартад нийцсэн баталгаажсан замтай болж, дэлхийн хөнгөн атлетикийн албан ёсны календарьт багтсанаар Азийн болон дэлхийн шилдэг тамирчдыг хүлээн авах боломж бүрдээд байна.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС

Нийтэлсэн огноо2026-04-20