Улаанбаатар, 2026 оны зургаадугаар сарын 11 /МОНЦАМЭ/. Азийн Аялал жуулчлалын 15 дахь удаагийн форум Улаанбаатар хотноо “Зочлох үйлчилгээ, аялал жуулчлалын Азийн парадигм” сэдвээр энэ сарын 11-13-нд болж байна.

Уг форумыг ССАЖЗЯ, нийслэлийн Аялал жуулчлалын газар, Аялал жуулчлалын мэргэжлийн холбоо, Хонгконгийн Политехникийн их сургууль, Аялал жуулчлалын боловсрол хөгжлийн нийгэмлэг хамтран зохион байгуулж буй юм. Форумд БНСУ, Австрали, БНХАУ, Шри-Ланка, Камбож, АНУ, ХБНГУ зэрэг 22 улсын 100 гаруй шилдэг илтгэгч, эрдэмтэн судлаач, бодлого тодорхойлогчид оролцож байна. Тэд Азийн аялал жуулчлал, зочлох үйлчилгээний хөгжлийн чиг хандлага, тогтвортой хөгжлийн шийдэл, хамтын ажиллагааны боломж, дижитал шилжилт, хиймэл оюун болон үйлчилгээний роботын хэрэглээ, байгаль орчин, нийгэм, засаглалын бодлого зэрэг орчин үеийн тулгамдсан асуудлыг хэлэлцэж байна.

Аялал жуулчлалыг хөгжүүлэх 2023-2028 оны урт хугацааны стратегийн хүрээнд болж буй тус чуулган нь дотоодын салбарыг олон улсад сурталчлан таниулах зорилготойг Монголын аялал жуулчлалын мэргэжлийн холбооны дэд ерөнхийлөгч Д.Батболд онцлоод, цаашилбал эрдэм шинжилгээний судалгааг практиктай уялдуулах, гадаадын хөрөнгө оруулалт татах, маркетингийн шинэ гарцыг нээхэд бүс нутгийн хамтын ажиллагаанд томоохон түлхэц болно гэж найдаж байгаагаа тодотгосон юм.

Форумыг 1993 оноос хойш Азийн аялал жуулчлалын салбарт тулгарч буй хөгжлийн чиг хандлага, үйлчилгээний менежмент, маркетинг, тогтвортой байдлын асуудлуудыг хэлэлцэх зорилгоор уламжлал болгон зохион байгуулж иржээ. 

Оюундэлгэр.Б

Нийтэлсэн огноо2026-06-12